Lassallek gose-greba bertan behera utzi du Toyalen bermea lortu ondoren
PARIS
Jean Lassalle diputatuak amaitutzat eman zuen, joan den ostiralean, duela 39 egun hasi zuen gose-greba, Toyal enpresaren zuzendaritzak Accous herrixkan daukan lantegia garatuko duela agindu ostean. Diputatu biarnesak grebari ekin zion Nazio Biltzarreko areto batean, bertan talde japoniarrak ekoizpenaren zati bat 60 kilometrora lekualdatzeko asmoa iragarri zuenean, bere bailarako enpresa industrial bakarra denaren «ezkutuko itxiera» zela konbentzituta. Baraualdia aurrera zihoan heinean, erreakzioak eta atxikimenduak ugaritu egin ziren, eta, azkenean, Nicolas Sarkozy eta Dominique de Villepin ministroak eta Jacques Chirac presidenteak berak esku hartu zuten aferan. Ostiralean bertan, Japoniako enbaxadorea tarteko, sinatu zuten akordio bat enpresaburuekin. Hitzarmenaren arabera, Toyalek Accouseko lantegian garatuko du jarduera osoa, baita proiektu berriak ere. Horren truke, gobernu frantsesak laguntzak emango dizkio.
Kapitalismoa, «izurritea»
UDFko hautetsiak esan du bere ekimena ez dela «etsi-etsian egindako zerbait», baizik eta «kontzientziak astintzeko keinu xume bat». Kapitalismoaren aldeko agertzen da, baina, haren esanetan, «ordainik ezean, izurrite bilakatu da». Egun erietxean osatzen ari den diputatuaren jokaerak, halere, polemika bizia sortu du. Enpresa pribatuaren askatasunaren kontrako xantaiatzat eta kanpo inbertsioa erakartzeko kaltegarritzat jo dute ekintza. Alain Rousset Akitaniako lehendakariak berak «akatsa» izan dela adierazi du:«Benetako lekualdatzea egiteko asmorik ez zuen enpresa jopuntuan jarri da, eta, gainera, garapen ekonomikoa sustatzeko ekimen publikoaren porrota begi bistan geratu da».
|
