LONDRES
Charles De Menezes gazte brasildarraren hilketagatik ez dutela inor epaituko argitaratu zuen atzo “The Sun” egunkari sentsazionalistak. Auzia lantzen ari den abokatu bat da Britainiako egunkariaren iturria.
Horren berbetan, De Menezesen heriotzarekin zerikusia duten Britainia Handiko hamar poliziakideak auzibidean jartzeko «froga nahikorik» ez dago. «Akatsak egon ziren; baina ez, ordea, deliturik», ondorioztatu zuen abokatuak. Tiroak egin zituzten poliziakideek aginduak bete zituztela eta operazioaren ardura zutenek terrorismoaz susmagarria zela uste zutela argudiatu zuen.
27 urteko gaztea 2005eko uztailaren 22an hil zuten, Londresko Stockwell metro geltokian. Poliziak zortzi tiro eman zizkion bere buruaz beste egin zezakeen «terrorista» bat zelakoan. Bezperan, hilabete hartako bigarren eraso sorta gertatu zen. Scotland Yardeko agintariak gizartean sortutako izuaz baliatu ziren «susmagarriak» tirokatzeko agindua emateko.
Hilketa azaltzeko Poliziaren jatorrizko bertsioa gezurrezkoa zela egiaztatu zuten. Scotland Yardeko buru Ian Blair-ek eta lehen ministro Tony Blairrek berek onartu zuten «akats larria» izan zela. Horrek sortu zuen egonezari aurre egiteko erantzuleak epaituko zituztela agindu zuten. Poliziaren jardunek sortzen dituzten kexuak bideratzen dituen batzordeak (IPCC) hamar poliziakide lotu zituen Menezesen heriotzarekin, baina, dirudienez, irailean plazaratzekoa duten txostenak denak kargugabetuko ditu.
Hala ere, “The Sun”ek dioenez, txostenak antolakuntza akatsak egon zirela agerian uzten badu, Ian Blair-ek dimititzeko egun dauden presioak nabarmen areagotuko dira.
