Asier AIESTARAN
DONOSTIA
Ruben Belokik ez du inolako aitzakiarik izango Buruz Buruko Txapelketaren final-laurdenetan Patxi Ruizen aurka jokatzeko. Atzo egindako osasun probek erakutsi dutenez, Burlatako atzelariak zuntz haustura txiki bat baino ez du eskuin izterreko abduktorean eta, beraz, zazpi edo zortzi egun baino ez ditu eman beharko geldirik. Ondoren, entrenamenduak egiten hasteko moduan izango da Asegarcekoa.
Belokik hiru aste ditu hurrengo kanporaketa prestatzeko. Aurreko larunbatean Oier Zearrari 22 eta 12 irabazi ostean, Buruz Burukoak bi asteko geldiune bat izango du. Hamabost egun barru lehen bi finalerdiak jokatuko dira Olaizola II/Eugi eta Gonzalez/Leiza eta astebete geroago, beste biak Beloki/Patxi Ruiz eta Irujo/Peña. Hain zuzen ere, aste hori ezin hobeto etorriko zaio Belokiri prestaketa erabat osatzeko.
Labriteko partidan, markagailua 13 eta 8koan zela, sakea egiterakoan hartu zuen min Ruben Belokik. Kolpea tiratzerakoan, ziztada bat sentitu zuen atzelariak, eta tantoa amaitu bezain laster aldageletarako bidea hartu zuen. Urrutia sendagileak lotura bat jarri zion pilotariari eskuin izterrean eta, errenka aritu arren, Belokik neurketa hura nahiko osorik amaitu zuen.
Lehen begirada hartan, sendagileak eta pilotariak antzeman zioten haustura bat izan zitekeela minen iturri, eta zuntz haustura hori baieztatu egin da azkenean. Hala ere, hasieran Beloki bera ere nahiko ezkor azaldu zen arren, azkenean final-laurdenak jokatzeko arazorik ez duela izango jakin dugu. Bestalde, Patxi Ruizek ere izan ditu osasun arazo batzuk azkenaldian. Bere parte-hartzea ez da arriskuan egon, baina behar bezala entrenatu ezinik ibili da.
Honebestez, lau aldiz txapeldun izan denak (95, 98, 99 eta 01) 2003. urteko irabazlearen aurka neurtuko ditu indarrak.
