DOMINTXAINE

Euskaraz egindako antzerkiak Amikuzen bere tokia har dezan, 17 eta 24 urte bitarteko hamar gazte bildu dira Kirikatzan/k taldean. Antzerkiaren munduan esperientzia ezberdinak izan dituzten gazte euskaldun horiek bere herrian kultur talde gisa egituratu nahi dute, eta, aldi berean, antzerki talde egonkor bat sortu Amikuzen.

Antzerki lantegi ezberdinetan, Donibane Garaziko lizeoan eta Xalbador kolegioan aritutako gazte horiek lehen aldiz guztia antolatzeaz arduratu dira, eta egitasmo guztiz berri bati hasiera eman diote. Oinarrian antzerkia maitatzea dago, eta horrekin batera, euskarazko animazio bat sortzeko gutizia. Amikuzen euskarazko antzerkirako ohitura handirik ez badago ere, ikusleak badirela ziurtzat jotzen dute bai taldekideek, baita antzezlanaren gidoilari Mattin Irigoienek ere.

Azken urteotan Amikuzeko kantonamenduan euskaraz egin dituzten antzezlanen gidoilari bakarra da Irigoien, eta hark baieztatu du euskara eremu pribatuetan baliatzen duen jendea antzerkiaren inguruan biltzea dela erronka.

Joan den urteko udazkenean hasi ziren taldekideak inprobisazio ariketak egiten, eta handik ateratako ideiekin idatzi du Irigoienek gidoia; geroztik gazteek lau hilabete daramatzate entseatzen. Lanak gaur egungo arketipoak agerian utzi nahi ditu, eta horretarako Amikuzeko eta bereziki Donapaleuko errealitatea baliatu du. Gazte jendearen egunerokotasunarena ispilu ez ezik adin gehiagokoenarena ere bilakatu nahi du antzezlanak. Irigoienen ustez, antzerkiaren xedea zerbait aditzera ematea da eta, aldi berean, ikusleek bere burua agertokian dauden pertsonaietan ikustea.

“Gaztetasunak erabiltzen nau” lana Domintxainen estreinatu eta gero, atsedenaldi bat egingo du taldeak ikasturtea bukatu arte, baina antzezleek obra Euskal Herrian zehar zabaldu nahi dutela adierazi dute. Antzezlana Donapaleun pasatzen bada ere, beste herri askotan ere girotu daitekeela nabarmendu du egileak.