URNIETA

Mikel Zalbide Donostian jaio zen, 1951n. Nafarroako Unibertsitatean egin zituen unibertsitate-ikasketak. Industria-ingeniaria da. Euskarak landu gabe edo landu arin zituen alorretan hasi zen lanean, gaztetan. 1972an, artean ikasle zelarik, Elhuyar elkartearen eta izen bereko aldizkari teknikoaren sortzaileetarikoa izan zen. Zientzia-tekniken alorreko ikasmaterialak prestatzen eta hitz-eraketazko azterlanak bideratzen hartu zuen parte, horrezaz gainera. 1976tik 1978ra bitartean Euskaltzaindiaren matematika-azpibatzordearen kide izan zen. 1978tik 1981era arte, Unibertsitate Zerbitzuetarako Euskal Institutuaren (UZEI) zientzia-tekniken alorreko arduradun izan zen.

Halaber, 1979tik 1980ra, Eusko Kontseilu Nagusiak eta Bilboko (gero Euskal Herriko) Unibertsitateak sorturiko Planifikazio-batzorde mistoaren kide izan zen. 1981. urteaz geroztik Hezkuntza, Unibertsitate eta Ikerketa Sailean ari da lanean, eta Euskara Zerbitzuaren buru da. Eskola-munduaren euskalduntze-saioa, eta saio horren ikuspegi soziolinguistikoa: hori du bere lanbidearen ardatz, azken mende-laurdenean.

1983. urteaz geroztik euskaltzain urgazle da Mikel Zalbide. Bi eratako langintzatan saiatu izan da Euskaltzaindian: Iker saileko hiztegigintza alorrean batetik, eta Jagon sailean bestetik.