MAULE
‘‘Maiatza eszenan’’ jaialdiaren aurtengo edizioak omenaldia egin nahi die beren lana landa inguruan, eta, bereziki, Zuberoan aurrera ateratzen duten artistei, ikusgarriak egiteko etengabe bataiatzen diren antzer- kigileei, hain zuzen ere. Aurreko edizioetan bezala, jaialdia kulturaren tokiaz eta horrek gizartean hartu behar dituen engaiamenduez kezkatu da. Horregatik, paperik gabe bizi diren etorkinen bizipenak ‘‘En regard de Sangatte’’ liburuan bildu dituen Denis Lecat gonbidatu dute Maulera.
Antzerki jaialdi horretako antolatzaileek nabarmendu nahi izan dute jaialdia oraindik gaztea bada ere, bere ibilbide motzean urteko hitzordu kultural garrantzitsuenetarikoa dela.
Ostegunean arratsaldeko zazpietan emango diote hasiera jaialdiari Hiri Garaia plazan. Bederatzietan Parisko Chiche Capon konpainiak kaleko antzerkiaren barnean kokatzen den ‘‘Le saut de la mort’’ komedia antzeztuko du. Hurrengo egunean konpainia berak San Frantzisko eskolan kabareta eskainiko die ikasleei eta hara hurbildutako antzerkizaleei.
Ostiral arratsean Kioskoan aperitibo musikatua izango da Xibero txarangarekin eta Tokiako kideek pailazokeria batzuk egingo dituzte. Azkenik, Dut-ek jokoak egingo ditu. Bederatzietan Maule Baïtha gelan Jean François Balerdiren «one man show»a izango da.
Larunbatean Ribouillot anaiek aperitiboa animatuko dute eta, bukatzeko, Markeline konpainiak ‘‘Carbon Club’’ kale antzerkia egingo du.
