- Berezkoak (Amikuzeko Torneoko finala)
Sorhuetek eta Etxetok lortu dute txapela
DONOSTIA
Sorhuetek eta Etxetok lortu zuten Amikuzeko Torneoko txapela. Beraz, oraingoan Paxkal Ezkurrak ezin izan du txapelik jantzi. Urruñako atzelaria azkenaldi honetan garaipenak pilatuz ari zen, baina atzo aurrez aurre izan zuen bikoa hobea izan zen, eta merezita jantzi zuten txapela.Hastapenetik hartu zuen aurre gero txapela jantziko zuen bikoak. Jokoa atzean egin zen, eta hor Etxetok mendean izan zuen Paxkal Ezkurra, eta aurrean Sorhuietek ez zuen barkatzen. Alderik handiena hamar kintzetakoa izan zuten, 15-25. Orduan, Ibarrola ere atzera joaten hasi zen, Paxkali laguntzera, Urruñakoak ez baitzuen bere egunik onena, eta markagailuan hurbiltzen hasi ziren. Apurka-apurka, gero eta gertuago ziren bi bikoak, eta asko Ezkurra gaztearen beste txapel bat izango zela pentsatzen ere hasi ziren, baina ez zen horrela izan. 36-38 eta 37-39 jarri ziren, baina azkenean Sebastien Sorhuetek kintze ederra egin zuen, eta amaieran txapela jantzi zuten. Zaleek ere gustura txalotu zituzten bi bikoak. Goi mailako pilotari horiek ez dute atseden hartzeko beta handiegirik izango, berriro ere EPBrako puntuagarria den lehiaketa jokatuko baita ostiraletik aurrera, eta oraingoan Angelun izango da.
|
