- Urrezko Aizkora
Arrospide eta Larretxea Zeanurin neurtuko dira
DONOSTIA
Urrezko Aizkoran, aste honetako jardunaldia etzi
jokatuko dute Zeanurin, baina gero, hurrengo astearen lehen egunean,
astelehenean, alegia, Karrantzan izango da beste ekinaldia, eta horrekin maila
nagusiko finalerdiak nola geratuko diren jakin ahal izango da.
Etzi, 18.00etan hasita, Zeanurin neurtuko dira Arrospide
eta Larretxea. Azken hori garaipena lortzera behartuta dago, bestela akabo
beretzat lehiaketa. Arrospidek, aldiz, irabaziko balu, multzoko lehen postua
izango litzateke beretzat; eta bigarren postua, berriz, Mindegia- rentzat.
Larretxeak irabazita, berriz, denbora guztiak ikusi beharko dira. Beste
multzoan, Nazabal eta Txapartegi astelehenean neurtuko dira Karrantzan.
23 urtez azpikoetan, berriz, Rekondok finalerdietarako
urratsa egin dezake Atutxa II.a mendean hartuta. Hori lortzen badu, finalerdiak
segurtatuta izango ditu. Urrezko Harri-jasotze lehiaketan, berriz, Bigarren
Mailako lehiaketa izango da. Alde batetik, Telleria II.a-Eizmendi izango dira,
eta bestetik, berriz, Urrutia-Agirre. Lehen Mailako ekinaldia astelehenean
egingo dute, eta Izeta aita-semeen arteko dema interesgarria izango da. Aitak,
Izeta II.ak, Landarbiderekin osatuko du bikoa, eta Izeta IV.ak, berriz, Aimar
Irigoien izango du lagun.
|
