IRUÑEA
Volkswagen Navarrako bi mila bat langilek Landabenen elkarretaratzea egin zuten enpresaren ate nagusiaren parean, eta ondoren manifestazioa egin zuten industrialdean zehar «Inposizioen aurka, negoziazioa» pankarta zeramatela. Bi ekintza horiek CCOO, LAB eta CGT sindikatuek deitutako lanaldi bakoitzeko bi orduko lanuzteekin egin zuten bat, gainera. Sindikatuek agertutakoaren arabera, lanuzteen ondorioz ekoizpena geldiarazi zuten lantokian, eta 300 auto inguru egiteari utzi zioten. Sindikatu horiek negoziazioa berriz hasteko eskatu zuten.
Datorren hitzordua bihar bertan izango da Iruñean; izan ere, batzordeak antolatuta eta CCOOko, LABeko, CGTko, ELAkoeta ESK-ko metaleko federazioek babestuta, manifestazio bat egingo dute lantokiak jarraitu eta Nafarroarako industria politika eskatzeko eta deslokalizazioa salatzeko. Manifestazioa 18.00 irtengo da Golem zinemetatik.
Alde horretatik, BSEElectrodomesticos enpresako eta UCAR Electrodos Ibericako batzordeek biharko manifestazioa «babesten» dutela esan dute, eta enpresako langileei bertan parte hartzeko deialdia egin diete.Aralarrek eta VWko langileen seme-alabek ere deialdian parte hartuko dutela esan dute eta gizarteari bertaratzeko eskatu diote.
Sanchez Bruna iraindu zuten
UGTk asteazkenean azken bi kaleratzeak salatzeko VW Navarran egindako elkarretaratzean lantokiko sindikatuko idazkari nagusi Josu Sanchez Bruna eta beste hainbat «kide» iraindu eta mehatxatu zituztela salatu du sindikatuak. «Beharrezkoak ikusten ditugun neurriak hartuko ditugu», esan zuen, eta irainak egin zituztenei sindikatuko edozein kideri gertatu ahal zaionaren erantzule egingo diela argitu zuen. Bestalde UGTko eta CCOOko metaleko federazioko bina ordezkari Alemaniarantz abiatu ziren VWko lehendakari Bernd Pischetsriederrekin biltzeko. Horiek hala, Landabeneko hitzarmenaren negoziazioaren blokeoa amaitu nahi dute.
Bien bitartean, VWko langileek atxikimenduak jasotzen jarraitzen dute, aipatutakoez gainera, Iruñeko Donibane auzoko bizilagun talde batek ere bere «babesa» agertu die-eta. Alde horretatik, elkarretaratzea egingo dute gaur bertan, 19.00etan, Donibaneko Asuntzionen Plazan.
