Azpeitiko osasun etxea euskalduntzeko ekimena
AZPEITIA
Azpeitiko Euskal Herrian Euskaraz-ek hizkuntz eskubideen aldeko manifestaziora deitu du datorren ekainaren 23rako, bide batez, herriko osasun etxean euskararen egoera «larria» eta «lotsagarria» dela salatzeko. EHEko kideek gogorarazi zuten orain hiru urte hasi zirela herriko osasun etxean euskarak zuen egoeraz arduratzen eta, beste hainbat eragilerekin baturik, lan-dinamika bati ekin ziotela azaldu zuten.Egoera aldatu nahian, 2005ean sinadura-bilketa jarri zuten martxan: «500dik gora sinadura jaso genituen. Horrek argi azaldu zigun herritarrak osasun etxean euskarak duen egoera aldatzearen aldekoak direla». Izan ere, EHEk argudiatu zuen larrialdietako sendagileek eta erizainek ez dakitela euskaraz, bi pediatrak ez direla hizkuntza horretan komunikatzeko gai eta familiako mediku gehienek ez dakitela euskaraz. «Salbuespentzat jo behar dugu harreran dauden langile gehienek euskaraz jakitea», zehaztu zuten.
Erantzunik ez
Herritarren sinadurak eta 35 eragileren atxikimenduak Azpeitiko Udalera, Lakuara eta Osakidetzara bideratu zituztela zehaztu eta azken horren erantzuna soilik jaso zutela nabarmendu zuten, «baina ez aldaketak ekartzeko modukoa. Egoera tamalgarri horrek bere horretan jarraitzen du, eta egoera larria eta lotsagarria dela ikusi dugu».Erakunde horiek neurriak hartu beharko lituzketela irizten dute EHEko kideek, eta, besteren artean, euskara planak egitea eta langileak euskalduntzera bideratzea aipatzen dituzte. Beraz, Azpeitiko osasun etxea euskaldundu eta hizkuntz eskubideak errespeta daitezen, manifestazioa egingo dute hurrengo ostiralean, hilak 23, 19.00etan, herriko plazatik abiatuta.
|