DONOSTIA
VIII. Erromeria Eguna uztailaren 15ean egingo dute, Errenterian. Donostiako Koldo Mitxelenan egindako aurkezpe- nean, jaialdiaren helburuak zehaztu zituzten. Jon Maia dantzariak adierazi zuenez, xedeetako bat herri dantzarekin eta musika tradizionalarekin gozatzea izango da. Maiaren hitzetan, ohiko ekitaldietara joaten den jendeak ikusle hutsaren papera betetzen du; Erromeria Egunean, ordea, ikuslearen parte hartze zuzena bultzatu nahi dute.
Parte hartze hori gauzatzeko, Aiko Dantza Taldeak eskainiko duen emanaldiari aipamen berezia egin zioten. Aitor Furundarena eta Sabin Bikandi musikariek azaldu zutenez, dantza irakasle batek lagunduta joko dituzte abestiak. Horrela, ikusleek zuzenean dantzatu ahal izango dute.
Sabin Bikandik dantzak erakusteko “naturaltasuna” nabarmendu nahi izan zuen: «Gure helburua ez da dantza ikusgarriak erakustea. Dantza sinpleak erakusten ditugu, ondoren jarraipena izango dutenak, alegia».
Bikandik, dantzari berari garrantzi berezia eman zion atzoko aurkezpenean: «Dantzarako jotzen dugu. Dantzaria baino garrantzitsuagoa dantza bera da. Dantzaren egitura errespetatzen saiatzen gara bai musikariak baita dantza irakaslea bera ere».
Errenteriako Erromeria Egunean, haurrek garrantzi berezia hartuko dute. Iaz Pirritx eta Porrotx pailazoen emanaldia eskaini bazen ere, aurtengoan Txirri, Mirri eta Txiribiton Junior taldeak hartuko du lekukoa. Mikel Otaegik (Txirri) honakoa adierazi zuen: «Dantza eta musika ere jokoak dira, eta horiekin jolastea izango da helburua».
Euskal dantzak eta abestiak baliatuz haurren parte hartzea sustatuko dute. Txirri, Mirri eta Txiribitonen betiko abestiak moldatu eta beste hainbat euskal abesti prestatu dituzte Erromeria Egunean haurrak oholtza gainera igo daitezen. Dantzaren hurrengo zita, beraz, uztailaren 15ean, Errenterian.
