Baga Bogaren ustez, Illunbeko «irregulartasunak legeztatzen» ari da Gipuzkoako Diputazioa
DONOSTIA
Donostiako Udalak Illunberen erabilpena aldatzeko Plan Orokorrean egindako berriztapenak aztertu dituela esan ostean, gune horretarako erabilpen tertziarioak onartzea erabaki duela azaldu zuen Gipuzkoako Diputazioak.Hartara, gune horretako zinema, diskoteka eta erabilpen tertziarioa duten gainerako lokalen egoera legezkoa izango da hemendik aurrera. Lokalen esleipenaren gainean, erakundeko bozeramaile Koldo Azkoitiak zehaztu zuen Donostiako Udala izango dela lokalen banaketaren ardura izango duena, eta esleipena «beharrezko prozedura administratiboak betez» egin beharko dela gaineratu zuen.
Ekimen pribatuaren alde
Baga Bogaren iritziz, Diputazioa Illunben «hasieratik izan diren irregulartasunak» estaltzen ari da:«Irregulartasun ugari izan dira eta, orain, horiek legeztatzen saiatzen ari da. Lardaskeria hutsa izan da Illunberekin egin dutena, eta argi daukagu administrazioak ekimen pribatuaren alde egiten ari direla», ziurtatu zuen.Baga Bogakoek zehaztu zutenaren arabera, SADE enpresak zinemen arduraduna helegitea aurkeztu zuen Illunbeko lurra komunitatearen ekipamenduetarako lurzoru gisa arautua zegoelako. Arauketa horren arabera, gune horretan dauden zinemak eta diskotekak ez lirateke legezkoak izango eta, beraz, euren jarduera eten beharko lukete. Gipuzkoako Diputazioaren erabakiarekin batera, ordea, aipatutakoen jarduera legeztatu egiten da. Era berean, Baga Bogak gogora ekarri zuen Illunbeko obra legezko prozedura errespetatu gabe eman ziotela Nuevo Desarrollo de Anoeta enpresari eta, egun, Euskal Herriko Auzitegi Gorenaren epaiaren zain daudela nabarmendu zuen:«Orain arteko instantzia guztietan arrazoia eman digute, eta orain Donostiako Udalak helegitea aurkeztu du Gorenean, epaia betetzea ezinezkoa dela argudiatuz. Guk badakigu borondatea izanez gero bete daitekeela, ekipamendua berreskura daitekeela, alegia».
|
