- Kontxako Bandera
Irregulartasun handiak dopinaren aurkako probetan
·Traineruen pisaketa ofizialik ez zen izan joan den igandean
DONOSTIA
Hiru egun ere ez dira igaro azken polemika izan zenetik eta beste baten berri dugu jada, hori ere Kontxako Banderan gertatutakoa. Euskadi Irratiko “Tostartean” saioan Castroko La Marinera ontziko arraunlari batek azaldu zuenez, Donostiako estropada amaitzean dopinaren aurkako kontrola pasatu behar izan zuten kirolariek irregulartasun handiak nabaritu zituzten ekintza horretan.
Aurten, leku falta dela-eta, Gurutze Gorriak kaian duen eraikinean egin behar izan dituzte kontrolak. Talde ezberdinetako arraunlari batzuek dopinaren aurkako probak pasatu behar izan zituzten igandeko estropadaren ostean. Kirolari bat, behintzat, txiza-potea betetzeko arazoak zituela-eta, kalera irten zen denbora egin nahian, eta inork ez zion azaldu horrelakorik ezin zela egin. Donostiako Kultur eta Turismo Ekintzetxea (KTE) gertatutakoa aztertzen ari da, irregulartasunak nabariak baitira.
Hori gutxi balitz, igandean beste arazo larri bat gertatu zen. Izan ere, estropada guztietan, txapelketa zein proba normala izan, traineruak pisatu egiten dituzte. Kontxan, ostera, ez zen halakorik gertatu, KTEk hori guztia kontratatua zuen arren. Goizean ontziak pisatu zituzten, baina betiere ofizialtasunik gabe.
|
