DONOSTIA

Probak sekulako ikusmina piztu bazuen, ezin esan Aiara bertaratu zirenek inongo damurik izango dutenik, sekulako apustua ikusi baitzuten. Bi abereek ikaragarrizko lana egin zuten, eta amaieran zaleek txaloen bidez eskertu zuten denen ahalegina.

Hasieran dirua Olarrearen aberearen alde atera zen, baina Urkiagaren lana ikusi ostean bere aldera pasatu zen; hala ere, amaierarako, berriro ere Asteasukoaren alde zegoen. Urkiagaren aberea izan zen plazaratzen estreinakoa, Isuzko eta Larrazabal itzain zituela. Artekariek 40 plaza baietz esaten zuten, baina oso aparte geratu ziren, ordu erdian harriari tiraka aritu ostean, 64 plaza egin baitzituen. Sekulako lana egin zuen abere horrek, eta orduan jarri zen dirua bere alde. Atzetik plazaratu zen Olarrearen aberea, Elordui eta Urrutia itzain zirela. Aurreko abereak ikaragarrizko lana egin baldin bazuen, ezin esan gutxiago egin zuenik honek, eta 29 minutu eta 15 segundotan ondu zuen aurrekoaren marka. Berak eraman zuen apustua, baita jokoan zeuden 6.000 euroak ere. Urkiagaren abereak 105 kiloko gainkarga eraman behar izan zuen, eta Olarrearenak, berriz, ez zuen bat bera ere eraman beharrik izan. Abereek 1.250 kiloko harria erabili behar izan zuten.

Olarrea gustura zegoen garaipenarekin: «Hau sekulakoa da, niretzat munduko gauzarik garrantzitsuena izan da», esan zuen saioaren amaieran. Asteasuarraren ustez, atzetik aritzeak mesede egin zion. «Gaurkoan dudarik gabe. Harria erabiltzeko erraza zegoen. Erakustaldi batean erabilita zegoen, eta azpialdea gastatuta bezala zeukan, eta atzetik aritzeak mesede handia egiten zuen. Aurretik ibili izan bagina, seguruenik ere berak irabaziko zuen», esan zuen.

Olarrearen ustez, honek errebantxa ekarriko omen du: «Uste dut baietz.Haiek ez dira gustura joan harriarekin, baina nik horrekin ez neukan zer ikusirik, bientzat gauza bera zen», esan zuen.