- Trontza
Nafarroako bi txapel erabakiko dira Uharte- Iruñean
DONOSTIA
Etzi arratsaldean Uharte- Iruñera joaten diren zaleek ez dute Euskal Herriko Bigarren Mailako aizkolarien finala bakarrik ikusiko; izan ere, bertan trontzako Nafarroako bi txapel ere jokatuko baitituzte.
Alde batetik, emakumezkoen finala izango da, eta, bestetik, Bigarren Mailakoa jokatuko dute. Emakumezkoetan lau biko arituko dira. Honako lau bikote hauek eman dute izena: Nuñez-Lopez, Armenadariz-Urrizola, Txueka-Agerre eta Ariztegi-Galarraga. Biko bakoitzak 45 ontzako enbor bati hamar epai eman beharko dizkio etzanda.
Bigarren Mailako finala ere jokatuko dute, nahiz eta aurten bi bikotek bakarrik eman duten izena maila horretan aritzeko. Irabazleak heldu den urtean maila nagusian aritzeko aukera izango du. Honako bi biko hauek arituko dira etzi Uharte-Iruñean: Pello Kañamares-Julen Kañamares eta Urbistondo-Uharte. Bikote bakoitzak 45 ontzako enbor bati 10 epai eman beharko dizkio etzanda, eta lau, zutik.
|
