GASTEIZ

Gaur, zazpi eta erdietan banatuko dute, Atarrabiako udal pilotaleku zaharrean, aurtengo Lau eta Erdiko txapelketako azkeneko txartela. Aurrez aurre, ezaugarri oso ezberdineko bi pilotari arituko dira: Kepa Peñagarikano atzelari beizamarra eta Julen Retegi aurrelari iruindarra.

Printzipioz, partidak ez du faborito garbi-garbirik gaurko. Berez, atzelari gipuzkoarrak askoz ere esperientzia handiagoa dauka buruz buruko partidetan ­iaz txapelketa bikaina egin zuen kantxa osoan, eta Martinez de Irujo txapeldunari lan handia eman zion­ baina ikusteke dago dohainak kaiola barruan moldatzeko gai izango ote den. Atzelaria izanda, sake bikaina dauka Beizamakoak, eta horixe izan daiteke bere armarik onena.

Julen Retegi, berriz, bere bigarren aukera handiaren aurrean dago. Ezustean Buruz Burukoa jokatzeko aukera eman zioten, baina pattal aritu zen Urberuagaren aurka. Berriro ere txapelketa handi baten atarian jarri du enpresak, eta Lau eta Erdian hobeto moldatzea espero du.