Errausketaren alde duten «burugogorkeria» salatu du Batasunak
DONOSTIA
Jose Joan Gonzalez de Txabarri Gipuzkoako ahaldun nagusiak eta Odon Elortza Donostiako alkateak errausketaren alde duten jarrerak bi agintari horiek «burugogorrak» direla adierazten duela esan zuen atzo Batasunak. Gainera, gehiengoaren iritziaren gainetik, «inposaketaren bidea hautatu» dutela salatu zuen.
«Gipuzkoan egin dituzten herri galdeketek, inkestek eta bestelako ariketek garbi erakusten dute errauste-planten aurkako iritzia oso hedatuta dagoela. Gipuzkoarren %65 inguru azaldu dira aurka», esan zuen. Iritzia hori izanik, herritarren erabakia errespetatzeko eskatu zuen Batasunak, eta zubietarrak ere errausteko plantaren kontra daudela nabarmendu zuen. Hori adierazi zuen planta Zubietan jartzeko proposamenari buruz.
Zaborrak errauts bihurtzea irtenbidea baino areago arazoa dela esan zuen Batasunak, eta alternatiben artean, biometanizazioaren eta konpostatzearen alde azaldu zen, «erraustea baino merkeagoak, garbiagoak eta arriskurik gabekoak» direlako.
Beste alde batetik, Zubietako Gainetan planta ipintzeko proposatu dutela-eta, Luis Mari Oiarbide Garapen Iraunkorreko foru diputatuak atzo adierazi zuen Donostiako alkatetzaren erantzuna izateko goizegi dela, eta presioa ez egitearen alde azaldu zen.
|
