«MusikaGida» berria kaleratuko dute ezkutuko taldeak ikusarazteko
DONOSTIA
“MusikaGida” berriro kaleratuko dute, Euskal Herriko musikaren panoraman komunikazio bitarteko bilakatu delakoan. Sakabanatuta eta ezkutuan dauden musika talde maketagile horien guztien gaineko informazio berritua liburuxka batean biltzeko “MusikaGida” digitala osatu dute Gaztesarea kolektibokoek. Hala, edozein gazte elkartek, gaztetxek edo tabernak kontzertu bat antolatu nahi duenean ez du zertan betiko musika taldeetara jo, aukeran talde askoz gehiago izango baititu.2004. urtean, www.gaztesarea.net gazte atarian musika munduan ibiltzen ziren zenbait lagunek “Euskal Herriko talde gazteen MusikaGida” jarri zuten abian, musika mugimenduak hartzen zuen bideaz kezkatuta. Jakin bazekiten dozenaka zirela gure herrietako entsegu lokaletan biltzen ziren musika talde gazteak, eta ezagutzen zituzten euren eremu naturaletik at (herria, eskualdea...) kontzertuak eskaintzeko zituzten arazoak. 2004ko MusikaGidak egin du jada bere bidea. Lehenbizi paperean eta geroago Interneten gida digitalean. Bere garaian landu zuten haziak eman ditu bere fruituak eta Euskal Herriko musika mugimenduan ere ikusi dira izan dituen emaitzak. «Oraingo gure erronka gida berritzea eta hobetzea da, duela bi urte egin genituen akats txikiak konponduz», esan dute antolatzaileek. 2006ko gidan parte hartzeko, ezinbestekoa da edozein diskoetxerekin kontraturik ez izatea. «Musika herritarrean sinesten dugu, eta ez dugu musika negozio bezala ikusten», esan dute. «Gaztesareak ezin du musikaren panorama aldatu, hori gazte mugimenduak berak egin beharreko lan etengabea da; baina guk, komunikazio egitasmoa izanik, bitartekoak eskainiko dizkiogu lan hori errazteko», gaineratu dute.
|
