-Trontzako finalak -
Esnaola anaiek eta Etxebarria ahizpek eraman dituzte Euskal Herriko txapelak
·Gipuzkoako bikoa erabat nagusitu zen mutiletan eta Bizkaikoa nesketan
AGURAIN
Esnaola anaiek eta Etxebarria ahizpek irabazi zuten herenegun Agurainen Euskal Herriko Trontzalarien Txapelketa. Lehenengoek mutiletan, eta bigarrengoek, berriz, nesketan. Jendetza handia batu zen Aguraingo plazan finala zuzenean ikusteko asmoarekin, 500 lagun inguru bertan baitziren.Hasteko, mutilen finala izan zen, eta zazpi biko zirenez gero, bi txandatan banatu zituzten. Lehenengo txandan hiru bikote lehiatu ziren, eta bigarren txandan beste laurak izan ziren. Biko bakoitzak 60 ontzakoari bost epai etzanda, kana-erdikoari sei epai zutik, kana-erdikoari sei epai etzanda eta 60 ontzakoari bost epai zutik eman behar izan zizkien. Lehenengo txandan Esnaola anaiak, Velez de Mendizabal-Perez de Heredia bikoa eta Aitzkorbe-Cano bikoa neurtu ziren. Esnaola anaiak ziren Euskal Herrikoa irabazteko faborito nagusiak eta hasieratik hartu zuten aurrea. Lehen epaietan parean aritu baldin baziren ere, berehala hasi ziren zuloa egiten, eta zutikako lanetik aitzinera, erlojuz kontra aritu behar izan zuten. Txanda irabazteaz gain, txapela ere lortu zuten. Aitzkorbe eta Cano erdian geratu ziren, baina lan ona
egin zuten, baita amaieran hirugarren postuan geratu ere. Perez de Heredia-Velez
de Mendizabal bikotea berehala geratu zen atzean. Ez zen Arabako txapeldunen
egunik onena izan. Beste lau bikoak bigarren txandan ziren. Barberena anaiak
ziren, adituen ustez, Esnaola anaiei aurre egin behar zietenak, eta jendea zain
zegoen zer egingo ote zuten. Lehenengo lanean oso gogor aritu ziren, eta horien
amaieran segundo bakar bat ziren atzetik. Gero, ordea, lanetik lanera segundoak
galtzen joan ziren. Txanda irabazi
zuten azkenik.
Nesken finala
Mutilek beren lanak amaitu ostean, nesken txanda heldu zen. Sei bikote neurtu ziren eta denak batera aritu ziren. Biko bakoitzak 45 ontzako enbor bati 10 epai eman behar izan zizkion etzanda. Lehia ederra izan zen hasieratik amaierara. Etxebarria ahizpen eta Galarregi-Aristegi bikoaren artean dema ederra izan zen. Ia amaierara bitarte bizkaitarrak eta nafarrak pare samarrean aritu ziren, baina azkeneko epaietan, ordea, Etxebarriatarrak freskoago zeuden eta txapela jantzi zuten. Galarregik eta Aristegik ere lan bikaina egin zuten, eta bigarren postuan amaitu zuten. Beste biko nafarrak, Agerrek eta Txuekak osatutakoak, ez zuen lan txarra egin, eta haientzat izan zen hirugarren postua. Hortik atzera geratu ziren hiru bikoek nahiko atzean amaitu zuten. Arabako bi bikoentzat izan ziren hurrengo bi postuak, eta bizkaitarrak izan ziren azken. Aguraingo finalean lehenengo eta azkeneko postuan izan ziren. Nafarrek ez zuten txapelik jantzi, baina bai mutiletan, bai nesketan, bigarren eta hirugarren amaitu zuten.
|
