BERA. ­ Berako Gure Txokoa elkarteak antolatzen duen Lurraren Egunak XX. edizioa beteko du igandean. Lehenbiziko ekitaldia larunbatean izango bada ere (17.00etan abiatuko da Lizuniagako igoera), egun nagusia igandekoa izango da. 10.30etik aurrera, eskulangile, barazki eta argazki erakusketaz gozatu ahal izango da. Azoka, gainera, txalapartaz, trikitiaz eta musika eskolako kideen doinuez girotuta egongo da. 11.00etan, gazta eta sagardo lehiaketak abiatuko dira; 12.30ean, Urnietako dantzarien emankizuna izango da, eta 16.00etan, haurrentzako jokoak. Iluntzean, azkenik, dantzaldia izango da Irats taldearekin.