DONOSTIA. ­ Gaur hasiko dira Aranzadi Zientzia Elkarteak Donostian antolatzen dituen astronomiari buruzko jardunaldiak. Aurten hamabosgarren edizioa beteko dute eta bertan hitzaldiez, zeruaren egunezko nahiz gauezko begiraldiez eta proiekzioez gozatu ahalko du Miramon parkeko Kutxaespaziora hurbiltzen denak. Hasiera «cambios climáticos y mecánica celeste» hitzaldiarekin emango dio Zaragozako zientzia fakultateko dekano Antonio Elipek. Hurrengo egunean, «Coreografías celestes» hitzaldia eta «Astrocine» izeneko proiekzio bildumaz gozatu ahalko da. Larunbat gauean izarrak eta ilargia begiratuko dituzte Arbideko dorreetatik, eta igandean, amaitzeko, eguzkia.

Abenduaren 1ean amaituko da CAF-Elhuyar sarietara aurkezteko epea

DONOSTIA. ­ Datorren abenduaren 1era arte dago zabalik Caf-Elhuyar sarietarako lanak aurkezteko epea. Duela hamahiru urte Elhuyar fundazioak CAF enpresaren babesarekin abian jarritako sariketa honek zientziaren dibulgazioa sustatzea du helburu. Sariketa honek euskaraz idatzitako zientzia eta ekonomiaren arloetako dibulgazio artikuluak sarituko ditu. Guztira lau sari banatuko dira: lehenengo hiruei dagozkienak alde batetik (1.000, 500 eta 300 euro hurrenez hurren eta oroigarri bana) eta 25 urtetik beherakoentzako beste sari berezi bat. Azken honek, lehenengo hiru postueto bat lortu ez badu, 300 euro jasoko ditu.