Antzuolako Sagastiko zelaian parke bat eskatzen dute
·Herrigunean adin guztietakoek erabili ahal izateko berdegune lau bakarra galtzera doala salatu dute
ANTZUOLA
Sagastin Parkearen Aldeko Plataforma joan den ekainaren erdialdean sortu zuen Udalak Sagastiko parkean egin asmo duen proiektuaren aurka dagoen herritar talde batek. Izan ere, Antzuolako Udalak Sagastiko zelaian Gizarte Etxea eraikitzea dauka aurrez ikusita, eta horretarako lanak nahikoa aurreratuta daude. Plataforma horrek, berriz, «herri barruan gelditzen den berdegune bakarra bere osotasunean parkerako bideratzeko» eskatzen du, eta hamaika ekintza egin ditu norabide horretan, azkena, joan den urriaren 6an izandako udalbatzan.
Mozio bat aurkeztu zuen Sagastin Parkearen Aldeko Plataformak eta, bertan, Udalari gai horren inguruan herri eragileekin adostutako galdeketa bat egiteko eskatu zion. Udalak galdeketaren emaitza errespetatzeko konpromisoa hartzeko eta emaitza jakin bitartean obrak ez hasteko erabakia hartzeko ere eskatzen zuen mozioak. Antzuolako Udalaren erantzuna, ordea, bestelakoa izan zen, «berandu» zebiltzala esan eta Gizarte Etxea aurrez ikusi bezala Sagastiko zelaian egingo zela jakinarazi zien plataformako kideei. Haserre agertu dira plataformakoak Udalaren jarrerarekin, «herritar zati handi baten iritziari eta nahiari bizkarra eman baitio».
«Udalak bere burua legitimazio guztiarekin ikusten du Sagastiko zelaian Gizarte Etxea egiteko. Legitimazio hori herriaren errealitate sozialaren ezagutzan eta hauteskundeetako emaitzetan oinarritzen du, baina, gure ustez, legitimazio hori herren dabil». «Agian, urriaren 6ko Osoko Bilkuran plataformak jasotako erantzunean egongo litzateke legitimazioa: orain gu gaude hemen eta guk erabakiko dugu zer egin», adierazi zuen plataformak.
Horiek hala, eta plataformak nabarmendu duenez, herrigunean adin guztietako pertsonek erabili ahal izateko berdegune lau bakarra betirako galtzera doaz.
|
