LARRESORO. ­ Ote Lore elkarteak, urtero legez, euskara eta euskal kultura sustatzeko nahiari jarraiki, hainbat ekitaldi antolatu ditu Larresoroko jaietarako. Gaur arratsean zazpi eta erdietatik aurrera Hernandorena bertso lehiaketaren lehen kanporaketa izango da herriko kirol areto berrian. Aperitifa hartu eta afaldu ondoren, Euskal Herriko sei bertsolari gaztek Arantxa Hirigoienek ezarritako gaiekin bertsoak asmatu beharko dituzte. Bihar Haurrock taldeak kantari ezagunen laguntzarekin kontzertua eskainiko du arratsaldeko lauretatik aurrera. Gaztetxoen taldeak Maddi Oihenart, Joseph Lafitte, Kattalin Indaburu eta Pil Pil taldearen laguntza izango du besteak beste.