- Harri-zulatzaileak
Aurrekoetxeak erronka gogorra izango du
BAIONA
Harri-zulatzaileen urteko bigarren apustua jokatuko dute gaur. Zamudion izango da 13.00etatik aurrera, eta bertan Aurrekoetxea Sondikako taldearen aurka neurtuko da.Aurrekoetxea Txoriherri taldeko zulatzailea da, eta egun dagoen onenenetakoa da. Sondika, berriz, Ligako taldea izango da, hiru lagunek osatutakoa. Ligan atzeko postuetan geratu ziren, eta horregatik izango dira bat hiruren aurka. Aurrekoetxeak sei zulo egin beharko ditu, eta Sondika taldekoek, berriz, bakoitzak bina zulo egin beharko ditu. Azkenean sei zuloak denborarik gutxienean egiten dituenak eramango du garaipena. Alde bakoitzak 1.500 euro jokatuko ditu dirutan.
Txingak
Gaur, Ordoñanan, 11.30ean hasita,Arabako nesken txinga Txapelketa jokatuko da. Honako kirolari hauek neurtuko dira: Meabe,Berasategi, Goloba, Ruiz de Arkaute eta Nobia. Kirolari bakoitzak 25 kiloko txingak erabiliko ditu esku bakoitzean, eta ahalik eta plazarik gehien egitea izango da helburua, eta horretarako ez du denbora zehatzik izango. Ana Berasategi da adituen ustez txapela janzteko faboritoetako bat, nahiz eta Golobarekin ere adi ibili beharko duten. Neska hori eslovakiarra da, baina Gasteizen bizi da.
|
