IRUÑA
Lizarrako epaitegiari eta Burlatako PSNko egoitzari molotov koktelekin eraso zieten ostegun gauean. Sortutako kalteak urriak izan ziren lehergailuek ez baitzuten eztanda egin. Lehenengo gertakaria ostegun gaueko 23.00etan jazo zen, Burlatako PSNko egoitzan. Nafarroako Gobernuko iturriek azaldutakoaren arabera, «hiru bat lehergailu» jaurti zituzten bertara. Ostiral goizeko 7.00e-tan, aldiz, ezezagun batzuek Lizarrako epaitegiaren aurka sei molotov koktel bota zituzten. Epaitegiaren aurrealdea «gasolinaz zikindu zuten», Gobernu espainoleko ordezkaritzak adierazitakoaren arabera.
Gertakari horien ostean, ohikoak diren gaitzespen mezuak iritsi ziren Nafarroako erakunde eta alderdi politikoen ahotik.
Gobernu espainolaren ordezkari Vicente Ripak adierazi du ekintza horien xedea alderdi politikoak, eragile sozialak eta ekonomikoak «estutzea bada», ez dutela «ezer lortzen».
Nafarroako Gobernuko Presidentetzarako PSNko hautagai Fernando Purasek adierazi du «40 urtez indarkeriak» ez duela «ezer lortu» eta prozesuan aurrera egiteko «horrelako ekintzak erabiltzen dituztenak oker» dabiltzala. «Haien oinarri eta helburu politikoak indarkeriaren bidez ezarri nahi» dituztela salatu du PSNko kideak.
Atzera bueltarik gabe
Horrelako ekintzek «prozesua sendotu beharrean tentsioa» eragiten dutela uste du Purasek eta horrela, «oso zaila» ikusten du prozesuak aurrera egitea. «Horrelako gertakariak gehituz gero, bake prozesua atzera bueltarik gabe baldintzatuko» dela adierazi du Purasek.IUNk ere gaitzespen mezuak helarazi eta Batasunari «inolako baldintzarik gabe, bakerako bidean parte hartzeko» eskatu dio. EAJk ere ekintzak gaitzetsi zituen eta «bake prozesurako trabak besterik ez direla» deritzo. CDNko presidente Juan Cruz Allik ekintzak gaitzetsi zituen eta bere aburuz, horrelako ekintzak «indarkeria egon badagoela frogatzen dute».
