Gobernu espainolaren egoitzari eraso diote
GASTEIZ
Identifikatu gabeko pertsona batzuek, ostegun gauean, Gobernu espainoleko ordezkaritzaren Gasteizko egoitzari eraso eta «Errepresioa ez da bidea» leloa zuten esku-orriak bota zituzten. Efe agentziak zabaldutakoaren arabera, jaurtitako bost molotov koktelek ez zituzten kalteak eragin.
Gauerdian jazo ziren gertakariak, eta agentziaren arabera, lagun batzuek lehenik su barrikada bat egin zuten segurtasun kamerak itsutzeko; gero, bost lehergailu bota zituzten. Efek esan zuenez, ez zuten kalterik sortu.
Paulino Luesmak, Gobernu espainolak EAEn duen ordezkariak, ekintzak gaitzetsi zituen, eta ezker abertzaleari kale borroka gaitzesteko eta eteteko deia egin zion. Luesmak «eraso faxista eta eraso terroritstatzat» jo zituen Gasteizen egindako ekintzak. PSEko Arabako idazkari nagusi Txarli Prietok aldiz, ezker abertzaleari kale borroka «desaktibatu» eta «bake prozesua desblokeatzeko» dei egin zion.
|
