BAIONA
Fatima Anime ezkontzekotan zegoen Baionako herriko etxean Marokoko bere senargaiarekin. Beharrezkoak zituzten paper guztiak prestatu eta bertara eraman zituzten.Baina, «ustekabean» ezkontza ospatu behar zuen herriko etxeko ordezkariak intereseko ezkontza zela erabaki du. Ondorioz, urte betez berekin eta bere bi seme-alabekin bizi zen gizona kanporatua izan da. «Ez nuen inolaz ere uste horrelakorik gertatuko zenik. Milesker Estatu frantsesari!», esan zuen. Gertakariaz geroztik depresioarekin dabilela onartu zuen. «Benetako shock emozionala izan da. Maite dudan pertsona kendu didate», salatu zuen.
Fatimak Baionako Herriko Etxeak beren ezkontza baliogabetzeko ateratako argudioak zituen gehienbat buruan gertatutakoa aipatzerakoan.
«Nire bizitzan sartu, eta egindakoak epaitu dizkidate. Argudio asko eman dituzte, ez ditut guztiak buruan, baina horien artean gizartearentzat ez nintzela nahiko garatua esan didate. Baionako gizartea babestu nahi zutela argudiatu dute», gogora ekarri zuen.
Haren ustez, Baionako Herriko Etxea izan da gertatu zaionaren errudun. «Ahalegin guztiak egin dituzte fiskalak nire ezkontza interesekoa zela esateko», erran zuen.
Marokon ezkondu
Gaur egun senargaia Marokon dago, eta bertan ezkontzekotan dira orain. «Zaila da bai niretako baita beretako ere. Bakarrik nago nire bi seme-alabekin, eta orain Marokora joateko joan-jinak egitera behartua nago prozedura guztia egiteko. Luzea da oso. Ezkondu orduko hiru eta sei hilabete artean itxaron beharko dugu berriz elkartzeko», argitu zuen. Geroari begira, hala eta guztiz ere, oso ezkor zegoela onartu zuen.
