Gure Irratiaren egoitzan kalte handiak eragin ditu sute batek
BAIONA
Atzoko azken orduan piztutako suteak kalte material larriak eragin ditu Gure Irratiak Uztaritzen daukan egoitzan. Sua gaueko bederatziak aldera piztu zen, oraindik ezezagunak diren arrazoiak zirela medio, bertako gela tekniko batean eta berehala zabaldu zen irratiko beste gela batzuetara. Kanboko eta Uztaritzeko suhiltzaileak bertaratu ziren sua itzaltzera eta ordu eta erdiren buruan egoera kontrolpean zeukaten. Haiek jakinarazi zuten, hain justu, kalte materialak dezentekoak zirela.
Egoitza berri-berria
Gure Irratiak Uztaritzen daukan egoitza berri-berria da, ez da urtebete zabaldu zutela. Udalbideren eta Euskararen Erakunde Publikoaren diru-laguntzari esker zabaldu zuen egoitza berria irrati horrek eta, hartara, Baionatik Uztaritzera pasatu zen. Inbertsio benetan handia egin dute lokal horretan eta punta-puntako materiala biltzen zuen.Gure Irratia 1983. urtearen amaieran hasi zen martxan eta gaur egun hamar langilek egiten dute lan bertan.
|
