Basakeria eta heriotza presente izanen dira Velickovic-en erakusketan Angelun
Vladimir Velickovic jatorri serbiarreko margolariaren lanak daude ikusgai Georges-Pompidou galerian eta Beatrix Enea landetxean. Erakusketarekin, Aristides de Sousa Mendes Portugalgo kontsulari omenaldia egin nahi izan diote. 2007an Gerard Fromanger-en, Jean Paul Chambas-en eta Ernest Pignon-Ernesten erakusketak ere jarriko dituzte.
ANGELU
«Irudikatuak diren gaiak ikusita ere, nik inoiz
ez dut nire lana negatibotzat hartu», adierazi izan du Vladimir Velickovic-ek.
Negatiboak ez badira ere, haren lanak unibertso larri eta artega baten ispilu
dira. Gerlak suntsitu duen gizartea irudikatzen dute artistaren margo, irudi eta
eskulturek. Parisen bizi da, baina jaiotzez serbiarra da Velickovic. Bere
lanetan oso presente daude bizi behar izan zituen II. Mundu Gerra eta Jugoslavia
ohia desegin zuen borroka «senide-hiltzailea». Angelun otsailaren 3ra arte
izanen da erakusketa. Artistak 1993. eta 2006. urteen artean egindako lan ilun
eta goibelak daude bertan. Bortxatutako gorpuak edo idunetik moztutako buruak
errealismo gogorraren eta abstrakzio inpresionistaren artean dauden irudi
surrealista bitartez agertzen ditu Velickovic-ek. Aldi berean, Ekialdeko
herrialdeek duten ohitura fantastikoen itzala nabaria da lanetan. Ikuspegi
apokaliptikoa era hertsian irudikatzeko margolariak bereziki beltza, grisa eta
zuria baliatzen ditu, eta odol kolorea duten gorri ukituak azkarki nabarmentzen
ditu. Kolorearen erabilera nabarmen horrekin margolariak botere hunkigarri
handia duten lanak aurkeztu ditu Angelun.
Sousa Mendesi omenaldia
Figurazio Berria mugimenduko beste hiru
margolari garaikide arrakastatsuk emango diote jarraipena artista serbiarraren
erakusketari. Heldu diren hilabeteetan, eta 2007ari hasiera handia emateko,
Gerard Fromanger-en, Jean-Paul Chambas-en eta Ernest Pignon-Ernest-en lanak
aurkeztuko dira Angelun.
Erakusketa horiek Aristides de Sousa Mendes II. Mundu
Gerran milaka iheslariren bizitza salbatu zuen Baionako kontsul portugesari
egindako omenaldian sartzen dira. Gerrateak sortzen dituen triskantzei erantzun
adoretsua eman zien Sousa Mendesek. Milaka pertsonari, bereziki juduei,
Portugalera joateko baimenak eman zizkien Estatu frantsesa nazien eskuetan
zegoenean.
|
