- Aizkora
Mindegiak min hartu du, eta oraingoz ez dago beste apusturik
TOLOSA
Miel Mindegiaren eta Larretxearen arteko apusturik ez da izango, Ezkurrako aizkolari beteranoak min hartu baitu, eta oraingoz, behintzat, ez dago aizkoran aritzeko moduan.Mindegiak joan den igandean bota zuen desafioa, eta hogei 60 ontzakotara edozeini jokatzeko prest zegoela iragarri zuen. Larretxeak hartu zuen desafio hori, eta atzo biak agertu ziren Tolosako Kantabrikora, baina han izan zen ezustea handia izan zen. Mindegia eskuin besoan min hartuta agertu baitzen berak egindako deira. Badirudi herenegun bere baserrian lanean ari zela min hartu zuela. Besoa erabat handituta dauka, eta handitu hori jaitsi bitarte probarik ezin zaionez egin, orain geldirik egon beharko du, eta gerora ere ikusi egin behar bere lesioa zer tamainatakoa den. Gauzak horrela, Larretxeak ere berehala ulertu zuen apustu hori ezin zela jokatu, eta horrelaxe geratu zen bilera. Ea bada, Mindegiaren lesioa ez den larria, eta berriro ere plazetan aritzeko moduan den.
Olasagasti etxeratu da
Joxemari Olasagasti, berriz, etxean da. Herenegun iluntzean egin zioten ebakuntza, eta atzo etxeratzeko moduan izan zen.Berak ekarri zuen gogora Azpeitian gertaturikoa: «Zutikako enborra mozten ari nintzen, eta ez dakit adarren bat edo zer jo nuen, kirtena hautsi egin zitzaidan eta aizkora nire belaunera etorri zen.Odol asko galdu nuen, baina azkenean dena ongi joan da», esan zuen.Azkenean lesioa hasieran zirudien bezain larria ez da, nahiz eta sustoa ez dion inork kenduko. Orain hilabete bat, gutxienez, geldirik egon beharko du, eta gero hasiko da apurka-apurka lanean. Kasualitatea batzuetan xelebrea izaten da, eta oraingo honetan ere horrelaxe izan da. Aste honen hasieran joan den igandean Olasagastik eta Mindegiak jokatutako apustu bikain hartaz hitz egiten aritu gara, eta gero, biek egun berean min hartu dute, eta orain biek plazetatik at egon beharko dute, eta ia ezinezkoa izango dute Binakako Urrezko Aizkoran parte hartzea.
|
