Biarritzek atzerapausoa eman du etxean galduta
·Tolosak lortutako puntu guztiak ostikoen bidez lortu zituen
BIARRITZ 16
TOLOSA 21
BIARRITZ
Biarritzek sailkapenean postu bat atzera egin du, atzo galdu egin baitzuen Tolosaren aurka, eta une honetan laugarren postuan geratzen dira. Partida hau iazko finalaren errepikapena zela ere esan daiteke, bi horiexek baitziren ekaineko final hartan, eta atzo, Okzitaniakoek orduko ordaina eman zieten.Partida honetan ere lainoa izan zen protagonista nagusia, eta norgehiagoka behar zen moduan ikusteko ere arazoak izan ziren. Partida bera ez zen ona izan, nahiz eta euskaldunak primeran hasi ziren, hamargarren minuturako Betsenek aurretik jarri baitzituen transformatutako entsegu bat lortuta. Hortik aitzinera, ordea, joko eskasa izan zen, oso aukera gutxi izan baitziren. Horrelakoetan, jaurtiketak izaten dira nagusi, eta atzo kanpotarrak askoz ere hobeto aritu ziren, lortutako puntu guztiak ostikoen bidez etorri baitziren. Sei zigor-kolpe eta drop bat egin zituzten, eta euskaldunek ezin izan zieten horri aurre egin, Yachvili ez baitabil aurreko urteetan bezain fin. Amaieran porrota, eta argi ibili behar dutela garbi geratu da, amaieran ezusteren bat izan nahi ez badute.
|
