BAIONA

Gaur egingo dute azkeneko entrenamendua, eta hor ikusiko da azkenenean hamaikakoan sartzeko moduan dagoen edo ez. Hasieratik jokatzeko moduan izango ez balitz, litekeena da Alverak lehen aldiz elastiko zuri-urdina janztea. Aste honetan fitxatu dute, eta baliteke aukera izatea. Zuri-urdinek gaur izango dute azkeneko lan saioa, eta horren ostean hiriko hotel batean batuko dira. Iluntzean Avironek eta Stade Françaisek jokatuko duten errugbi partida ere zuzenean ikusiko dute.

Lyonek atzo bertan ezagutarazi zuen gaur Baionara etorriko diren jokalarien zerrenda. Hortik Carew erori da, ez baita Euskal Herrira etorriko. Gaixorik omen dago, baina bestela ere etorriko ez zelako susmoak zeuden, izan ere, Celtarekin harremanetan baitago Vigoko taldera joateko. Etorriko ez den bestea Hartock da, baina lehendik ere jakina zen, ebakuntza egina baitago.

Honako jokalari hauek ekarriko ditu Lyonek: Coupet, Vercoutre, Avidal, Barthod, Cacapo, Clerc, Cris, Muller, Reviellere, Squilaci, Diarra, Juninho Pernanbucano, Kallstrom, Tiago, Toulalon, Ben Arga, Benzema, Bettiol, Fred, Gouou, Malouda, Remi eta Wiltord.

Gerard Houllier, Lyongo entrenatzailea, hizketan aritu zen atzoko entrenamenduaren ostean, eta argi eta garbi utzi zuen partida zaila izango zela: «Aviron asko hazi den taldea da, eta jende ona dauka. Guk talde ona atera behar dugu. Argi eta garbi erakutsi dute baionarrek Kopan zer egin dezaketen, eta ez dugu ezusterik nahi. Guretzat Kopak beti izan baitu garrantzia», nabarmendu zuen.

Aurki dezaketen zelaiari buruz, aldiz, honakoa esan zuen: «Ez nau kezkatzen, larunbatean errugbi partida dago, baina berdin dio, zelaia ongi edo gaizki egon, berdin jokatu behar da, eta bi taldeok han aritu beharko dugu. Galdu edo irabazi, horrek ez du inolako aitzakia izan behar», esan zuen.