Orotara, 24 hilabete inguru eman dituzte Amurrioko udaletxea eraberritzen eta bertako alkate Pablo Isasik (EA) atzo aditzera eman zuenez, «garai berrietara egokitzen». Bulegoek bi hilabete daramatzate funtzionamenduan, baina atzo eguerdira arte ez zen eraikina modu ofizialean inauguratu, aurresku eta guzti.

Egindako lanen ondorioz, eraikinaren bi hegalak zati nagusiarekin lotu dira. Modu horretan, erabilgarritasuna nabarmen handitzea lortu da, bi solairuarte berri sortu baitira. Gainera, eraikin osoa legezko irisgarritasun neurrietara egokitzeko ere aprobetxatu da, igogailu hidraulikoa jarriaz. Guztira, 1.382.686,70 euro behar izan dira eraberritzea gauzatzeko.

Hasierako eremua 900 metro karratukoa baldin bazen, obren eraginez, eraikitako azalera osoa 1.901 metro karratukoa izatera pasatu da, eta azalera erabilgarria 1.368koa, solairu ezberdinetan banatuta. Sotoan, erabilera anitzeko aretoa edo erakusketa aretoa aurkitzen da, eta solairuan irekitako zuloen bidez sarrera nagusiarekin lotua dago.

Beheko solairuan eraikinaren altura bikoitzeko sarrera nagusia eta Gizarte Ongizatearen departamentua daude, besteak beste. Alboetako hegaletara joateko aukera eskaintzen du harrera-lekuak. Lehenengo solairuan Euskara, Kultura, Hezkuntza edota Kirola bezalako sailen bulegoak, bilera gelak nahiz artxiboa daude, eta pisu bat gorago, idazkaritza, osoko bilkuren aretoa, alkatearen bulegoa nahiz batzorde aretoa topatuko du bertaratzen denak. Estalkiaren pea, azkenik, Ingurumen zein Nekazaritzarekin loturiko gaietarako utzi dute. Elementu modernoak nagusitzen dira uneoro.

1.904. urteko eraikina

Amurrioko Udaletxea ez da edozein motatakoa. 1905eko irailaren 11 arte inauguratu ez bazen ere, 1904. urtean eraiki zen, tradiziozko moldeak erabiliaz. Alegia, harlangaitzezko karga-hormak, kareharrizko harlandua zokaloan, erdiko gorputzaren beheko zatian eta aurrealde nagusiaren arkuetan, eta hareharrizko harlandua erlaitzetan, barlasaietan eta eraikinaren gainerako zuloetan. Akabera mistoa da, morteroarekin nahastua.

Mendeurrena ospatu duen arren, eraikinaren aurrealdea ez da apenas aldatu. Konposizio simetrikoa izaten jarraitzen du. Bi solairuko eraikin nagusia, sotoa eta ezker zein eskuineko hegalak, sotoa eta solairu bana dutenak. Eraikin nagusia hasiera-hasieratik udaletxe moduan erabili izan da. Ez da, ordea, berdina gertatu alboetako hegalekin. Neska eta mutilentzako udal eskolak aurkitzen ziren toki horietan.

1991. urtean, eskuineko aldean solairuarte bat eraiki eta lehen pisua eta sotoa Diruzaintza, Kontabilitate eta Eskuhartze arloa jorratzeko berritu ziren. 1999. urtean, ezkerreko hegalaren txanda etorri zen, sortutako solairuartea Hirigintza eta Katastrorako utziaz, eta gainontzeko eremuak erregistro nagusia eta agiritegia kokatzeko. . -

AMURRIO