- Idi-probak
Uztarri askorekin jokatuko dituzte Berrizko idi-probak
DONOSTIA
Azken urte hauetako kopuru handienetakoa izango da aurtengo Berrizko probetan. Atzo iluntzean abiatu zen lehiaketa, eta astelehen gauera arte egunero izango dira probak.
Gaur, 22.00etatik aurrera jokatuko dituzte probak, eta Basoarteren, Artolaren, Solagurenen eta Lopategiren uztarriak izango dira. Bihar, aldiz, arratsaldean eta gauean izango dira saioak. 17.00etan eta 22.00etan, Ixamaren, Matxainen, Landazabalen, Illarretaren eta Andrakasen bina uztarri arituko dira. Etzi, 17.00etan eta 22.00etan hasiko dira probak, Letearen, Txertudiren, Ibañarrietaren, Laskiren, Zerainen eta Illarretaren idiekin.
Azken eguna izango da astelehena, eta egun horretan ere 17.00etan eta 22.00etan izango dira probak, Illarretaren, Balentiñeren, Txertudiren, Izetaren, Telleriaren eta Lopetegiren idiekin.
Gizon proban, Nabarnizen izango da lehiaketa etzi.Txapelketa ofizialez gain, lehiaketa egiten den herri bakarra da. Etzi, 12.00etan hasita, Satsibar eta Basaibar neurtuko dira. 17.00etatik aurrera, berriz, Altzola, Ur pe, Ormaetxea eta Goenaga.
Asto-probetan, Intxaustiren astoak irabazi ditu amaitu berri diren Mendatako probak. 73 untze eta 2,20 metro egin ditu. Maiora elkartearena sailkatu da bigarren.
|
