DONOSTIA

Aldeko boza eman zuten alderdiek positibotzat jo zuten erabakia. EAJko ordezkari Xabier Ezeizabarrenak hitzarmenaren onarpena «bidea zabaltzen duen aurrerapauso positi- bo» gisa definitu zuen, baina osoko bilkurara «atzeko atetik» eraman izana salatu zuen.

EAko ordezkari Jaione Arratibelek, bestalde, hitzarmenak «hondakinen kudeaketaren arazoa konpontzeko bidean aurrera egitea» dakarrela eta «gehiago luza ezin daitekeen» erabakia dela esan zuen.

Hirigintza zinegotzi Jorge Letamendiak Udal Gobernuak hitzarmena «behartuta eta erantzukizun zentzuagatik» eraman duela osoko bilkurara azaldu zuen, «hondakinek epe motzean utzi behar baitiote San Markosera joateari». Era berean, «Donostian erraustea ez den beste irtenbiderik» ez dietela utzi adierazi zuen.

Presako prozedura baliatu behar zutela ikusirik, Baga Bogako kide Josetxo Ibazetak hitza hartu zuen hitzarmena ez aurkezteko eskatzeko, baina ez zioten hitz egiten utzi. Behin erabakia hartuta, Donostiako herri ekimeneko kideek gogor salatu zuten Udalbatzaren jarrera eta udal «demokraziaren erabateko iruzurra eta eskandalu hutsa» dela salatu zuen. «Odon Elortzari errauste-planten aurkako mozorroa erori zaio eta orain artean egindako adierazpen guztiak marketin politiko hutsak izan direla ikusi da», erantsi zuen.

Egindakoak ez du izenik

Ezker Batuko ordezkari Duñike Agirrezabalagak izandako paperari ere erreparatu zion plataformak, «premiazko prozedura erabiltzea bozkatu dutenean IUko ordezkaria udalbatza aretoan ez zegoelako». Agirrezabalagak, PSErekin batera Udal Gobernua osatzen duen taldearen ordezkariak, gaia aztertzeko asmoaren abisurik ez zuela jaso adierazi zuen, eta «lehiakortasun falta latz» horren ostean eta legealdia amaitzeko lau hilabete falta direnean, Udal Gobernua uzteko erabakia herri batzarraren esku utziko duela adierazi zuen.

Eguneko gai-zerrendan sartu gabe bazegoen ere, erraustearen aurkako taldeak ez ziren fio, eta osoko bilkura aretora bertaratu ziren atzo. Tartean zen Zubietako Herri Batzarreko lehendakari Imanol Azpiroz. «Argi ikusi da zein den politikarien maltzurkeria eta zein ahalmen duten legeak eta araudiak beren erara moldatzeko», adierazi zuen Azpirozek udaletxetik irten ostean. Haren esanetan, Odon Elortza da Gipuzkoako errauste-planta Donostian jartzeko emandako pausoaren arduradun nagusia, «bere akolitoarekin batera». Alde horretatik, aipamen berezia egin zion EAJ alderdiari. «Alderdiko iturriek adierazi ziguten presako prozedura ezin zela baliatu, horretarako halabeharrez gauza larria izan behar zuela-eta. Hori esaterako, guztia hitzartua zuten», salatu zuen Azpirozek. «EAko kideek ere badute erantzukizuna, azken batean, Diputazioan Odonekin kokagunea negoziatu baitute», gaineratu zuen.

Azpirozen esanetan, «herriari parte hartzea ukatuz» eta erabakiak modu horretan hartuz herriari barre egin diote Donostiako Udaleko politikariek. «Katalunia plazaren diseinua aukeratzeko horrenbesteko burrunba izan zuen parte hartzea Zubietan noiz bultzatzeko asmoa dute?», galdegin zuen. Baina galdera horretaz gain, beste hainbat zituzten Zubietako Herri Batzarreko kideek Udalari egiteko eta guzti-guztiak oso- ko bilkuran egiteko asmoa bazuten ere, aukera ukatu eta idatziz erantzungo dietela agindu zien.

Izatez, atzo hartutako erabakia kea baino ez dela adierazi zuen Azpirozek. «Lege aldetik joanez gero ez du inongo baliorik, eta egin den moduan gutxiago». Izan ere, errauste planta «legez» egiteko, adierazi zuenez, oinarrizkoa da Arabarako, Bizkairako eta Gipuzkoarako lege esparru bat izatea, «eta horrelakorik ez dago».

Hala eta guztiz ere, auzibideak «mantsoak» direla adierazi zuen eta Zubietan lanak egiten hasiz gero, horiek gelditzea oso zaila izango zela ohartarazi zuen. Horregatik, mobilizazioak abiaraztea «ezinbestekoa eta inoiz baino garrantzitsuagoa» dela azaldu zuen.

Proposamena aztertu beste irtenbiderik izan ez dutela adierazi ondoren, Letamendiak eginiko adierazpenen gainean jardun zuen eta bestelako alternatibak zergatik ez dituzten landu eta abian jarri galdegin zion. «Beren apustua zabor guztia nahastuta biltzearen aldekoa da, hori baita errauste plantak behar duen lehengaia», kritikatu zuen.

Azpirozek iragarri zuenez, auzibidea hartuko dute. «Batetik, horretarako eskumenik izan gabe gisa honetako erabaki bat hartzeagatik; eta bestetik, osoko bilkuran baliatu duten prozedura traketsagatik», adierazi zuen.

Aldundia eskuak igurtziz

«Hondakinen arazoa modu garbi eta eraginkorrenean konpontzeko oinarriak jartzea eta akordioak sinatzea egun erantzukizuna duten udalek, eta oro har Gipuzkoako erakundeek eta gizarteak duten arazo nagusietako bat da», azaldu zuen Azkoitiak.