Topagunearen eta federatutako euskara elkarteen helburu nagusia euskararen erabilera sustatzea izanik, Federazioak antolatzen dituen ekimen oro xede horretara bideratuta daude. Horiek hala, Film Laburren Zirkuituaren bitartez ematen den aukera euskarazko film laburren produkzioa ezagutzeko da, bai eta, bide batez, herri askotako kultura eskaintza aberasteko ere.

Alde horretatik, Zirkuituaren laugarren edizioak emanaldi gehiago egingo ditu. Izan ere, ekarriko dituen berritasunen artean hau legoke: Joan den urteko edizioak 20 emanaldi egin zituen, eta honako honek 37 izango ditu. Eskaintza bikoiztu du, ia-ia.

Atzoko aurkezpenean, Topaguneko Kulturgintza Saileko teknikari Manuel Moreno arduratu zen Zirkuituaren nondik norakoen berri emateaz. Eta, azaldu zuenez, aurten sei film proiektatuko dituzte emanaldi bakoitzean (aurrekoetan bost izan ohi ziren). «Dagoeneko zirkuitu honetan hamabost film aurkeztu dira. Eta aurtengo seiekin 21 izango dira orotara», adierazi zuen. Gainera, Ane Muñozen «Loturak» lana lehen aldiz emango dute horien artean. «Ohorea da guretzat», nabarmendu zuen Morenok.

Euskaraz sortzera animatzeko

Azken urteetan izandako ikusleei dagokienez, 1.200 lagun aipatu zituen arren, aurten zifra hori bikoizteko asmoa dute, batik bat emanaldien kopuruan egindako «jauzia» dela-eta.

Oro har, euskaraz egindako zinema ezaguratazi nahian, Zirkuituak eskaintzen duena «sarea» da, Morenoren esanetan; herrietara hedatzeko balio duen tresna, alegia. Eta horren bitartez, ahalik eta jende gehienarengana iristea dute xede: «Euskaraz sortzera animatu nahi di- tugu zuzendariak, eta horretarako euren lanak erakusteko plazak eskaintzen dizkiegu guk».

Emanaldien antolatzaileak tokian tokiko euskara elkarteak dira; Topagunea, berriz, koordinazio nagusia egiteaz arduratzen da. Alde horretatik, «herri finkoak» ez ezik ekimenarekin bat egiten lehenengo aldia duenik ere badela aipatu zuen, eta «pozgarritzat» hartu dute apustua arduradunek, ekimena poliki-poliki hedatzen doan seinale -Ipar Euskal Herrira lehenbiziko bisita izango da aurten-. Gainera, herri horietako asko txikiak izanik, berez zinemazalea ez den ikuslea erakartzeko balio dezake egitasmoak.

Honako hauek dira emango dituzten filmak: Iñaki Beraetxeren «Osaba Jaxinto», Ozkar Galanen «Xoxoak Beleari Ipurbeltz», Asier Altunaren «Sarean», Koldo Almandozen «Midori» eta John Anduezaren «Bilintx». Estreinaldia, berriz, Ane Muñozen «Loturak» lanarena izango da.