Larunbatean pintaketak egitea leporatuta Ertzaintzak bi gazte lasartear atxilotu ostean, hirurogeitik gora gazte bildu zen atzo beren «kezka eta amorrua» azaltzeko Lasarte-Orian eginiko prentsaurrekoan.

Atxiloketak, larunbateko 19.30ean gertatu zirela eman zuten jakitera, «bi gazteak, tabernetan, lagunekin batera inauteriak ospatzen ari zirela», gehitu zuten. Hala, Polizia autonomikoak azaldutako bertsioa «egundoko gezurra» dela salatu zuten agerraldian; Lakuako Barne Sailak bi gazteak pintaketak egiten ari ziren bitartean atxilotu zituztela ziurtatu baitzuen.

Gazteek azaldutakoaren arabera, ertzainak Lasarte-Oriako taberna batera hurbildu, eta gazte bat atxilotzen ahalegindu ziren. Orduan gazte ugari bertaratu zen, eta Ertzaintzak haietako beste bati identifikatzeko galdegin ostean, bi gazteak atxilo eraman zituztela adierazi zuten agerraldian.

Jazotakoa azaldu ostean, azken hilabeteetan bai Lasarte-Orian, bai Euskal Herri osoan, Poliziaren presentziak eta kontrol sozialak «sekulako gorakada» jasan duela salatu zuten. «Gazteen aurkako atxiloketak eta jazarpen polizial, mediatiko eta judizialak etengabeak» izan direla adierazi zuten.

Horren lekuko, Lasarte-Orian bertan jazotako hainbat gertakari ekarri zituzten gogora, hala nola larunbateko bi atxiloketa horiek, eta hainbat gaztek pairatu izan dituzten «jarraitze kasuak eta bahiketak». Gainera, astelehenean bertan hainbat ertzain pintaketak zeuden ingurura hurbildu, eta hango hatz-markak bilatzen aritu zirela adierazi zuten. Era berean, inguruan zen jendeari, pintaketen haritik, hainbat galdera egin zizkiotela adierazi zuten gazteek.

«Oker zabiltzate»

Bildutakoen iritziz, gertakari hauek guztiek badute helburu bat eta, hori, gazteria beldurtzea dela nabarmendu zuten. Bide errepresiboekin «oker» dabiltzala esan, eta gazteriak aurrera jarraituko duela berretsi zuten. «Aske, iraultzaile eta pentsaera kritikoz gainera», nabarmendu zuten bildutako gazteek.

Gazteria «herri honen etorkizuna» eta «herriaren ongarria» dela deritzote eta, horregatik, herri hau «lantzeari» uzteko asmorik ez dutela adierazi zuten. «Aske pentsatzen jarraitzeaz gain, jendearengan askatasun gosea sortzeari ekingo diogu une oro», gehitu zuten.

Bestetik, hainbat politikariri eta «diruzaleri» beren mezua zuzendu, eta «herria kontrolpean eduki eta gazteria hil nahi izatea» leporatu zieten bildutakoek. Alta, atxiloketen eta jazarpen polizialaren bidez, «gazteria esnatzea» besterik ez dutela lortuko gehitu zuten.

Azkenik, Lasarte-Oriako eta Euskal Herriko gazteriari au- rrera jarraitzeko gonbita egin zioten. Agerraldira bertaratu- takoen aburuz, «herria landuz eta borrokatuz» eraikiko baitu-te etorkizuna. Gainera, etorkizun horrek «independentzia izena» duela nabarmendu nahi izan zuten.