![](http://www.gara.net/naiz/naiz.gif)
Pello Añorga eta Txiliku: «buru-buruak» eta «buru galtzeak»
Buruari zer pentsatu emango dioten haurrei zuzendutako bi liburu aurkeztu zituen atzo Elkar argitaletxeak. Batetik, Pello Añorgak «Burua» izeneko lana idatzi du, pentsatzearen pentsatzeaz gorputza galtzen duen mutiko baten istorioa. Txilikuk, berriz, Alzheimer gaitzaren gaia jorratzen du «Malanjel Pirata» liburuan. Haur bat konturatuko da heroitzat duen bere aitonari pixkanaka «oroitzapena nola lapurtzen dioten».Ane ARRUTI | DONOSTIA
Modu batera edo bestera, burua da bi liburu hauetako protagonista nagusia. Txilikuren kasuan, aitonaren «buru galtzea» izango da zortzi urte inguruko biloba penatuko duena. Memoria eta oroitzapenei buruz mintzo da zarauztarra «Malanjel Pirata» liburuan. Mutikoak heroitzat du bere aitona, Francoren aurka borrokatu zuen «pirata», eta bien artean transmisioko harreman estua dute. «Sagu moduko batek oroitzapenak nola jaten dizkion ikusteak tristura izugarria sortzen dio haurrari», azaldu zuen Txilikuk.
Idazleak adierazi zuenez, Alzheimerra oso gertuko gaia da beretzat, «etxean bizi dugu». Gizarte honetan «bakoitza norbait da bizi duenagatik eta bizipen hartaz gogoratzen duenagatik». Istorio honetan mutikoak aitonaren gaixotasunaren aurrean parte hartu nahi du, eta «oroitzapenen lapur gaiztoari aurre egin, aitonaren memoria berreskuratzeko». Horretarako, koaderno batean arreta eskatzen dioten hitz bereziak idazten joango da.
«Oro buru, buru-buru»
Fantasian eta surrealismoan murgildu da Pello Añorga oiartzuarra. Pentsatzen hasi eta gorputzeko atal guztiak galduko dituen haur bat du protagonista «Burua» liburuak. Mugatuta sentituko da orduan eta bidaiari ekingo dio gizatasuna berreskuratzeko asmoz. «Burua, bihotza eta hankak bateratzean badirudi zoriontasun apur bat senti dezakegula, normalean egoera eskizofrenikoan bizi baikara», azaldu zuen Añorgak. Haren esanetan, haur, nerabe eta helduek irakurtzeko moduko liburua da, «denok sentitu izan dugu buru besterik ez garela, lanegun gogor baten ostean, adibidez». Egoera horretarako irtenbide bat proposatuko du istorioak.
Añorgak Haur eta Gazte Literatura mailako Euskadi saria eskuratu zuen iaz. Txilikuk, berriz, 2004an jaso zuen. Biak agertu ziren umeei ere «bizitzako benetako arazoak» azaltzearen alde. «Umeak askotan inozotzat hartzen ditugu eta `Disney ikuspegia' ematen diegu, dena azukreztatuta. Nire ustez, ez luke horrela izan behar, halako batean arazo horiekin topatuko baitira», azaldu zuen zarauztarrak.
«Umeak askotan inozotzat hartzen ditugu eta `Disney ikuspegia' ematen diegu, dena azukreztatuta. Baina halako batean arazo horiekin topatuko dira», adierazi zuen Txilikuk liburuaren gaiaren inguruan.
«Burua, bihotza eta hankak bateratzen direnean badirudi zoriontasun apur bat senti dezakegula. Normalean egoera eskizofrenikoan bizi baikara», azaldu zuen Pello Añorgak.