Juanjo Lopez eta Aitzol Atutxa izango dira igandean 12.0etatik aurrera Azpeitiko Izarraitz pilotalekuan jokatuko den Urrezko Aizkorako maila nagusiko bi finalistak. Bientzat lehen aldia izango da, eta Lopezen eskarmentua eta Atutxaren gaztetasuna eta freskotasuna uztartuko dira.

«Gustura nago. Agian ez nago pasa den udan eta udazkenean nuen puntu horretan, baina orokorrean ongi nago», adierazi du Juanjo Lopezek. Atutxa ere ez dago gaizki. Pasa den igandean 23 urtez azpiko finala irabazi zuen, eta bera ere lehen final handirako pronto dago. «Niretzat 23 urtez azpikoa irabaztea helburu bat zen, baina ez maila nagusiko finalean izatea. Uste dut lortutakoarekin oso gustura nagoela, eta galtzeko gutxirekin eta irabazteko askorekin noala. Nire burua ongi ikusten dut», nabarmendu du aizkolari bizkaitarrak.

Finalari begira, bietako inork ez du uste iraupen probara bitarte garaipena erabakiko denik. «Aurretik zaila da alde handiak ateratzea. Dena dela, zutik jarrita orain enbor handiagoak daude, eta agian horiek zerbait erabaki dezakete. Amaierara dezenteko aldearekin helduz gero, beti errazagoa da, baina uste dut amaieran erabakiko dela», dio Lezaungoak.

Atutxa ere amaieran erabakiko delakoan dago. «Aurretik lan handiagoa dago, baina uste dut iraupen proban erabakiko dela», dio. Izan ere, aurretik dena ematerik ez dagoela uste dute bi finalistek. «Amaierakoa lan luzea da. Aurretik dena emanda iristen bazara, amaiera oso luzea egin daiteke. Zerbait gorde beharra dago», dio Atutxak.

Tarte gehiago errekuperatzeko

Igandean hiru final izango dira, eta horrek aizkolariei geldirik egoteko tarte gehiago emango die. Hori mesederako izango dela uste du Lopezek. «Lan ezberdinak dira, baina orokorrean oso azkarrak. Beraz, betekada azkar heltzen da. Lan batetik bestera tarte gehiago izanda errekuperatzeko, hobe da guretzat. Gu lan luzera gaude ohituta, eta abiadura proba hauetara ohitzea dezente kostatzen zaigu», dio Lopezek.

Lopez da bietan beteranoena. Gainera, Lezaungoak berak onartzen duenez, azkenaldian bere kirol bizitzako unerik gozoenetakoak bizitzen ari da: «Iaz Urrezko Kopa irabazi nuen, eta Nafarroakoan eta Euskal Herrikoan ere bikain ibili nintzen. Orain Urrezko Aizkorako finalean nago. Nik uste dut oso une onean nagoela».

Lopez lasai eta bere buruarekin seguru dago. «Aurrez esan bezala ez nago nire punturik onenean, espero dut hemendik hilabetera edo hilabete eta erdira egotea, baina, hala ere, finalean sartu naiz. Nik badakit nire lana ongi egiten baldin badut irabazteko aukera asko izango ditudala, eta horretan saiatu behar dut», esan zuen.

Nahiz eta zale askok Atutxaren aldeko joera agertzen duten, bizkaitar gazteak ez du uste bera izango denik faborito. «Ni faboritoa bera delakoan nago. Egia da ligaxkan elkarren aurka neurtu ginela eta irabazi egin niola, baina uste dut hau final bat dela, eta gauzak ezberdinak izango direla. Horregatik, ez dut uste erreferentzia hark balioko duenik», nabarmendu du.

Bientzat Urrezko Aizkorako lehen finala izango da. Ilusioz gainezka dira, baina finalak jokatzen ohituta ere badaude, eta, alde horretatik nahiko lasai daude. «Azkenaldian final dezentetan ari naiz sartzen, eta ohitzen ere ari naiz. Irabazteak beti ilusio handia egiten dit, eta Urrezko Aizkorako final bat lehen aldiz irabaztea handia litzateke», dio nafarrak.

Bizkaitarra ere nahikoa ohituta dago. Pasa den astean 23 urtez azpikoa, eta orain maila nagusikoa: «Finalak jokatzeko ederrak dira, baina, lehen esan bezala, hemen egoteak ezustean harrapatu nau. Ez zegoen helburuen barruan, baina behin hemen sartuta irabazi egin nahi dut. Txapelketa bi txapelekin amaitzea handia litzateke». Auzia igandean erabakiko da, eta, gertatzen dena gertatzen dela, irabazten duenak lehen aldiz jantziko du Urrezko Aizkorako txapela.