Ikastaroetan izena eman dutenei tokiko telebisten errealitatea eta egunerokotasuna erakusteko Euskal Herriko zenbait hedabidetako ordezkariak gonbidatu dituzte Eibarko egoitzara. Urdaibai Telebistako Joxe Antonio Uriarte “Itxaso” eta Ttipi-Ttapako Joxe Manuel Irigoien izan ziren atzo euren esperientziaren berri eman zutenak eta, gaur, GoiTB eta Goierri Telebistako ordezkariak izango dira.

Itxaso zein Irigoienek tokiko telebisten erronka nagusia eta buruhauste gehien eragiten diena produkzioa izan ohi dela ziurtatu zuten. Eta hedabide horiek euskara hutsean lan egin nahi dutenean ­ikastaroetan parte hartuko duten laurak bezalaxe­, arazoa areagotu egiten dela nabarmendu zuten.

Urdaibai TBren kasuan, zortzi langileren artean eguneko lau orduko produkzioa egiteko bidea dutela azaldu zuen Itxasok: «Denek dena egin behar izaten dugu, halako telebista txikietan ezin dugu pertsona gehiagorentzat soldatarik eskaini», azaldu zuen. Estudioko saio gehienak aurretiaz grabatuak izaten badira ere, zuzeneko emanaldiak ere egiten dituzte Urdaibai TBn eta, Itxasok azaldu zuenez, behin baino gehiagotan bi pertsonak moldatu beharra izan dute saioa grabatzeko: «Hiru lau kamera jartzen ditugu, geldi, eta kontroletik pertsona bakarrak eramaten du irudia eta soinua, aurkezlea hizketan ari den artean», adierazi zuen.

Tokiko telebista hori Lea Artibai eta Urdaibaiko berriez arduratzen da eta baliabide pertsonalen urritasunak mugikortasunean mugak jartzen dituela azaldu zuen: «Zaila egiten zaigu leku guztietara iristea, baina nola edo hala aurrera egiten dugu. Kazetaria falta den uneetan mikrofonoa norbaiti eman eta ‘esan bi edo hiru minututan hemen ikusi duzuna’ esaten diogu. Hori da, azken batean, benetako tokiko telebista».

Finantzaketari dagokionez, diru iturrien %40 publizitate bidezkoa dela azaldu eta Gernikako udalak emandako laguntza eskertu zuen.

Ekonomia, muga nagusia

Ttipi-Ttapako ordezkariak tokiko komunikabide baten norabidea populazioak berak markatzen duela adierazi zuen, eta telebista haiei zuzendua izango dela aintzat hartuz, herritarren nahia aztertzea ezinbestekoa dela ziurtatu zuen. Mugak, aldiz, ekonomiak markatzen omen ditu.

Prentsa idatziarekin eta irratiarekin alderatuz, telebistak baliabide gehiago eta garestiagoak behar dituela esan zuen, batez ere teknologia aldetik. Mugikortasunaren garrantzia ere aipatu zuen: «Gainerakoek joaterik ez badute telefonoz jakin dezakete albistearen berri, baina, guk derrigorrez joan behar dugu, irudiak behar ditugulako. Horrek denbora gehiago eskatzen du, lana zailtzen digu eta garestiago ateratzen zaigu», eman zuen aditzera.

Bortzirietatik hasi eta Malerreka bitartean jasotzen da Ttipi-Ttaparen emisioa eta zortzi urte daramatza martxan. Eskarmentuaren eraginez, zuzenekoak egiteari utzi egin ziotela azaldu zuen Irigoienek eta soilik hauteskunde garaietan egiten dituztela azaldu zuen.

Egun, hamabi dira tokiko telebista horretan dabiltzan langileak ­sei produkzioan eta beste horrenbeste arlo komertzial eta administratiboan­ eta Ttipi-Ttaparen programazioaren %66,6 eurek ekoitzitako programen bidez egiten dute. Gainontzekoa elkartrukeko saioak dira, ETBri erositako saioren bat edo beste ere emititzen duten arren.

A. A.
EIBAR

Udako Euskal Unibertsitateak “Sustraiak (ber)piztu” lemapean abiatu ditu aurtengo Udako Ikastaroak Eibarko ikastetxe nagusian, eta jardunaldien irekiera ekitaldian Lore Erriondo UEUko zuzendariak azaldu zuenaren arabera, ikastaroak biziberritzea eta gizartera hurbiltzea da helburu nagusia: «Sustraiak berpiztuz, 34. aldiz antolatu ditugu aurten Udako Ikastaroak, Eibar, Baiona eta Iruñean. Gure izate eta nortasunari eutsiz, gaurko premiei erantzun nahiaz biharkoa hobea izateko ahaleginean, aukera ugari lantzeko erronka ez da makala».

Era berean, UEUren ikastaroak «unibertsitario euskaldunen topaleku» direla ekarri zuen gogora Erriondok, eta, elkarren berri izateko, proiektu berriak partitzeko eta abian jartzeko, lagunak egiteko eta euskal kulturaren egoera zertan den bertatik bertara ikusteko aukera ematen dutela nabarmendu zuen.

Ikastaroek hiru astez irauten dute eta azken asteko kurtsoak Baionan emango dituzte. Zentzu horretan, Erriondok UEUren lehen urteak oroitu zituen: «Gorazarre egin nahi diogu duela 34 urte lehen hatsa eman zigun Ipar Euskal Herriari, eta, sustraien erroa galdu ez dugunez, aurtengo ikastaroak Ipar Euskal Herrian UEU sorrarazi zuen loraldiari omenaldia eskaini nahi diote. Nahiz eta sustraiak ez diren berpizten, sustraiei lotuta egonik, berpiztu dezakeguna hastapen hartako ilusioa da. Aurten aukeratu dugun irudiak ere bizitasun hori, ilusio hori adierazi nahi du, eta hori dela-eta, uda arrosaz tindatzeko deia egiten dizuet», esan zuen UEUko zuzendariak.