Denboraldi hasieran Phonaken baikortasuna urduritasun bilakatu da. Taldearen asmoa zen Landisek denboraldia ondo hastea gehiegi korritu gabe, atseden hartu eta Dauphinen bueltatzea Torrerako prestaketa osatzeko.

Landisek parte hartu zuen lehenengo hiru itzulietan ­California, Georgia eta, batez ere, Paris Niza­ garaipen handiak lortu zituen. Pro Tourreko proban aldapan gora Patxi Vila nafarra izan zen estatubatuarraren gurpila jarraitu zuen bakarra, eta erlojupekoan maila bikaina eman du beti. Lehenengo aldiz txirrindulari garaile bihurtu da, eta hori zen falta zitzaion bakarra.

USPostalen Armnstrongentzat Tourrean lan egitea zen haren papera. Dauphinen lortutako bigarren postua eta Algarveko itzuliko garaipena izan ziren lorpen handienak. Ez zegoen gustura, eta horregatik Phonaken eskaintza onartu zuen iaz nagusiaren kontra egiteko. Errepidean ez zion minik egin, bederatzigarren bukatu zuen Tourra onenen martxa jarraitu ezinik, baina bai ordea bere adierazpenekin. Armstrong tiranotzat jo zuen publikoki, eta hori eta Pereiro Hincapieren kontra esandakoa zela-eta, Pauren bidean Phonak eta Discoveryk tirabira handiak izan zituzten. Hincapie bere taldeko lagunak itotzeko zorian utzi zituen Pereirori aurrera joaten ez uzteko.

Galiziarrak ihes egin zuen azkenean tropeletik eta neguan Phonaketik, baina John Lelanguek ­talde suitzarraren managerra­ konfiantza osoa zeukan Landis eta harekin gelditzen ziren txirrindulari guztiengan.

Apirilean taldearen nagusiak adierazi zuen konfiantza hori: «Tourra irabaztera joango gara Floyd Landisekin. Motibazio handia dauka, aurten fisikoki eta mentalki hobekuntza nabarmena izan du, eta urte honetan irabazteko maila badauka. Lance Armstrong ez dago, lasterketa irekiago azaltzen zaigu eta talde indartsua eramango dugu maillot horia irabazteko. Santi Boterok Tourra prestatuko du eta hori izango da urteko lehenengo helburua. Landis eta bera aldapan gora ondo egongo dira, eta Gutierrez, Nicolas Jalabert eta Perdiguerorekin lan egiteko eta lasterketa kontrolpean izateko talde polita daukagu. Landis guretzako txirrindulari handia da, eta harekin irabaz dezakegu. Korritutako lasterketa guztiak irabazi ditu. Atsedena hartuko du eta Dauphinen eta Tourrean aurrean egongo da. Basso txirrindulari handia da, baina Landisek motibazio handia dauka eta Tourra irabazteko gai da».

Botero eta Gutierrez

Baina, apirila pasatu zen, eta maiatzean Santi Botero eta Quique Gutierrezen izenak atera ziren Eufemiano Fuentesekin lotuta. Valentziarrak, bitartean, Giroan bigarren postua lortu zuen. Duela bi urte Camenzind, Hamilton eta Santi Perezen positiboengatik Pro Tourretik kanpo gelditzeko zorian egon zen talde suitzarra, eta, horren ondorioz, hiru txirrindulari horiek kanporatzeaz gain, Urs Freuler managerra eta Alvaro Pino zuzendaria bota zituzten. Haien ordez Torreko inguruan zegoen John Lelangue eta Festinaren irudia garbitzen aritu zen Juan Fernandez iritsi ziren, eta dopingaren kontra borrokatzeko asmoa erakutsi zuten.

Santos Gonzalez iazko Vueltan taldetik bota zuten lehenengo postuetan zegoela, etapa bukatzeko gutxi falta zenean. Botero eta Gutierrezen izenak atera bezain pronto taldeak Tourretik kanpo utzi zituen. Landisek, beraz, ez du izango laguntza handiegirik mendietan. Alexander Moos, Victor Hugo Peña eta Martin Perdiguero izango dira lan hori bete beharko dutenak.

Ahulegi Dauphinen

Eta maiatza hilabete gogorra izan bazen, ekainean Phonakeko talde burua ahulegi ibili zen Dauphinen aldapan gora. Proba test bezala hartu zuen Tourrari begira eta Mont Ventouxeko bidean bere taldea gogoz jarri zuen tropeletik buru martxa gogortzeko asmoarekin. Bera izan zen atzean gelditu zen lehenengo faboritoa.

Dauphinetik Tourrera ­gainera gogortasuna azkeneko astean dago gehienbat Alpetetako etapetan­ badago forma berreskuratzeko denbora, faborito nagusiak ez dira orain errepidean, baina denboraldi hasierako itxaropenak zalantzak dira orain. Larunbatean bikain aritu zen irteeran segundo batzuk galdu ondoren. Orain mendietan eman behar du maila ona eta gaurko etapa, azkeneko kilometroetako sei mendateetan, inportantea da Landis eta Phonakentzat bere liderraren maila ikusteko. -