LIZASO 30
URRUTIA 35

Iraupena: 74 minutu. Markagailua: 2-0, 2-3, 5-3, 5-5, 12-5, 13-8, 13-18, 17-18, 19-19, 21-20, 21-25, 22-27, 23-30, 24-32, 27-33, 29-34 y 30-35. Sakeak: 9 eta falta bat Lizasok, 12 Urrutiak. Tantoak: 17 Lizasok (9 atzean, 4 errematean eta 4 errestoan) eta 19 Urrutiak (5 atzean, 8 errematean y 6 errestoan). Hutsak: 3 Lizasok eta 4 Urrutiak. Apustuak: Ehun hogeita hamarri hasieratik gorrien alde. Gertaerak: 700 ikusle Galarretan. Aurpegi ezagunak ere bai: Aimar Olaizola, Txomin Perurena, Julen Lopetegi, Jokin Errasti edota Joxean Tolosa, esaterako.

DONOSTIA

Urrutiak eta Lizasok txapelketako partidarik onena jokatu zuten, erritmo ikaragarrian. Markagailuan aurrea Lizasok hartu zuen, Urrutiaren akats apurrak ­egin zituen lauretatik hiru­ lehen zatian iritsi baitziren. 12 eta 5 aurretik ibili zen beteranoa eta bazirudien katedrak ongi asmatu zuela dirua bere alde botata.

Baina aldeak ikusita, Urrutiak bere joko onena atera eta txapeldun handien mailan jokatu zuen hortik aurrera. Saketik hasita ­12 tanto egin zizkion erresto ona duen pilotari bati­, sekulako kolpea erakutsi zuen saldiastarrak, baita aurrean tantoa maisuki amaitzeko abilezia handia ere ­5 horma-biko eta 3 dejada egin zituen­.

Baliabide horiei guztiei esker, Urrutiak 1-13ko partziala sinatu zuen eta Lizaso konturatzerako aurkaria aurretik zuen markagailuan (13-18). Ikusten zen kantxan Iñaki nahiko jota zegoela, baina esperientzia duela erakutsiz, ongi eutsi zuen gaztearen joko erauntsia. 19nako eta 20nako berdinketek lehia parekatua izango genuela pentsarazi ziguten.

Ez zen horrelakorik gertatu. Urrutiak arnasarik hartu gabe jarraitu zuen eta Lizaso bere lekua aurkitu ezinik ibili zuen norgehiagoka osoan. Beste tanto sorta eder batek 24-32 jarri zuen aurretik Saldiaskoa eta finalerdia erabat hautsi zuen.

Amaieran aldea bost tantokoa izan zen, nahikoa Urrutiak segidan lortzen duen laugarren garaipena eskuratzeko eta inork espero ez zuen final bateko protagonista izateko. Urrutiak eta Zeberio II.ak final-laurdenetako ligaxkan jokatu zuten elkarren aurka eta orduan ere gaztea izan zen nagusi 35-34 estu bati esker.

Urrutia oso pozik zegoen neurketa amaieran, egindako lanarekin harro. «Bera oso ongi hasi da eta niri, berriz, asko kostatu zait kantxan jartzea. Baina sakearekin asmatzen hasi naiz eta aurrean ere gauzak ongi atera zaizkit. Gaur ikusitakoa entrenamenduen ondorioa da eta finala jokatzera gaurko ilusio berarekin irtengo naiz», adierazi zuen Migel Marik.

Lizasok ez zuen inolako aitzakiarik jarri nahiz eta inoiz baino finago iritsi aurtengo txapelketara: «Gazteak indartsu datoz eta bera hobeto aritu da, zoriontzea besterik ez dago».