DONOSTIA

“Poxpolo ta Mokolo” diskoa kaleratu zuten aurrena. «Herri abesti asko bildu genuen. Oso lan polita izan zen, baina nahiko murritza ­ekarri du gogora Mokolok­. Gabonetako kantuz osatutako ‘Zorionak’ etorri zen gero». Horien aldean askoz landuagoa da honakoa pailazoaren iritziz: «Zein ekitaldi mota egin nahi dugun pentsatu dugu lehendabizi, eta hori kontuan izanda sortu ditugu doinuak. Bost urte baino gehiago daramatzagu haurrentzako lanak egiten, eta denborarekin ikasten eta hobetzen joan garela uste dut. Ilusio handiz prestatu dugu ‘Run-Run’, gure jendearentzat, ezagutzen gaituztenentzat. Gure berri ez dutenentzat ere aukera ona izan daiteke, ordea».

Doinu batzuk pailazoek berek sortuak dira eta bertzeak zenbait musika talderen melodiak dira. Hitzak, berriz, eurek eginak dira denak. «Ez dugu gai zehatzik izan buruan. Denetarik dagoela esango nuke. ‘Run-Run’ abestiak, adibidez, Euskal Herrian egindako bidaia baten berri ematen du eta country estiloko beste batek bakeroak ditu protagonista».

Run-Run ikuskizuna ere abiatuko dute pailazoek, eta Euskal Herriko hainbat txokotan aireratuko dituzte diskoko abestiak. Azaroaren 24an izanen da lehendabiziko emanaldia, Ategorrietan. «Museo batean gaude Poxpolo eta biok lagun batzuekin. Han hasten da istorioa. Gero Txina aldera joango gara eta hamaika abentura biziko dugu bidean», jakinarazi du Mokolok. Gurasoak ere izan dituzte gogoan ikuskizuna sortzerakoan, umeak bezain publiko garrantzitsua baitira. Esketx batzuk haientzat egin dituzte propio.