BILBO

Ezker abertzaleko kide eta ordezkari anitzek Bilbora deitu zituzten atzo kazetariak ekimen horren nondik norakoak azaltzeko, eta Itziar Lopategik eta Arantza Urkaregik idatzi bat irakurri zuten, euskaraz eta gaztelaniaz, hurrenez hurren.

Gogorarazi zutenez, zubiak toki batetik besterako igarobideak izan dira historian, eta egun ere funtzio hori betetzen dute: «Tartean aurkitzen ditugun oztopoak gainditzeko asmoz eraikitako igarobide sendoak dira».

Hori hala, hainbat gudatan zubiak jopuntu estrategiko izan badira, Bilbokoak ere suntsituak eta berreraikiak izan dira historiako hainbat pasartetan. Eta, arlo horretan, hiriburuko zazpi zubien historiari larunbatean beste esangura berezi bat gaineratu nahi diote: autodeterminazioaren eskaera eramango dute horietara. Lopategik berretsi zuenez, hori baita prozesu honen «oinarria», zazpi lurraldeetako euskal herritarren hitza errespetatzea, hain zuzen ere. Hauxe azaldu zuten: «Aldarrikapen horrekin, prozesuan urrats gehiago emateko herritarren borondatea adierazi na- hi dugu, eta gure herriari hi- tza eta erabakia emateko bi- dean igarobideak eraikitzen lagundu».

Haien ustez, azken finean, «autodeterminazioaren aldeko uholdea» izango baita gatazkaren korapiloa askatuko duena: «Gure herriaren hitza eta erabakia eskuratzeko bidea eta gure herrian demokrazia, justizia, askatasuna eta bakea eraikitzeko zubia!».

Aspaldian hasitako bidea «desitxuratzeko etengabeko saiakerak» izan direla salatu zuten aipatutako eledunek. Baina, segidan zera berretsi zuten: «Autodeterminazioak izan behar du abiatutako prozesuaren helburua, eta ez beste ezerk». «Euskal Herria aldaketa politikoaren atarian murgildurik dago, eta ezin diogu ihes egiten utzi esku artean dugun aukera historiko honi».