GARA

DURANGO

Joko ona eta emozioa ez ziren falta izan atzo Durangoko Ezkurdin. Aurreneko neurketan, palakoan, Iriondok eta Rekaldek 43-45 irabazi zioten Fusto eta Torreri azken hamarrekoan 39-36 eta 43-41 galtzen joan ondoren. Bigarrenean, zestakoan, Alberdi III.ak azken bi neurketak galdu ostean garaipena lortu zuen. Hori bai, Landerrek bikain lagundu zion atzetik, batik bat sakearekin ­8 tanto egin zituen­, eta Alberdi I.ak eta Elizegik osatutako goi-mailako bikoteari 29-35 irabazi zioten.

Lehenbizikoan, Rekalderen hasiera bikainak, Iriondok ondo laguntzen ziolarik, aurreneko abantailak eman zizkien urdinei, eta 6-11 eta 12-18 aurreratu ziren. Tartea mantendu egin zen, baina Pablo Fusto eta Jon Torre hobeto jokatzen hasi ziren eta 33-34ra berehala hurbildu, eta handik gutxira 37-36 aurreratu ziren. Handik aurrera, emozioa eta parekotasuna. Fustok eskuinez min egiten zuen, baina Iriondok eta Rekaldek, 43-41 galtzen zirela, errenkan azken lau tantoak egin zituzten.

Berdintsu gertatu zen Munduko Txapelketaren ostean berriro ere Durangon ikus ahal zitekeen zesta partidan. Urdinak 1-6 aurreratu ziren, baina laster iritsi ziren berdinketak (11, 12 eta 13na), baita gorrien abantaila txikia ere. Ricardo Alberdi ondo zebilen errematean eta Adolfo Elizegi tinko eskuinarekin (17-13), baina han amaitu ziren gorrien itxaropenak, Anton Alberdik bideratutako 0-11koak 17-24 utzi baitzuen markagailua.

Dena erabakita zegoela zirudien, baina aldea estutzen joan zen apurka-apurka, 27-29ra iristeraino. Hala ere, eta gorriek soilik bi tantora jartzea lortu bazuten ere, Berriatuko aurrelariak eta Zumaiako atzelariak berriro ere ihesaldi txiki bat egitea lortu zuten.