Epaileak Estatu espainoletik ateratzea debekatu dio Arnaldo Otegiri
MADRIL
Auzitegi Nazional espainoleko epaile Ismael Morenok ukatu egin dio Arnaldo Otegiri hilaren 12 eta 14 artean Estatu espainoletik ateratzeko eginiko eskaria. Batasuneko mahaikideak, aipatutako egun horietan, Berlinera joateko asmoa zuen, Rosa Luxemburgo Nazioarteko Konferentzian parte hartzeko. Bere erabakia argudiatzeko, Ismael Morenok azaldu du litekeena dela Otegi auzitegi berezira deitzea abenduaren 30ean, Barajaseko atentatuaren ostean, Donostian eman zuen prentsaurrekoaren harira.
Atzo jakinarazitako erabakiak Carlos Bautista fiskalaren eskaerari erantzuten dio. Izan ere, horren arabera, «ezinbestekoa da» buruzagi independentista Estatu espainolean egotea gaur egun baldintzapeko askatasunean dago, «Auzitegi Nazionaleko egoitza honetara edozein mementotan agertzeko prest».
Polizia espainola eta Guardia Zibila txosten bana osatzen ari dira joan den larunbateko agerraldiaren gai- nean, Otegik «desobedientzia» delitua egin zuelakoan. Zehazki, Fernando Grande-Marlaskak iazko urtarrilaren 17an ebatzitako Batasunaren ekinbideen etetean du oinarri jardunbide judizial berri horrek.
|
