Eta orain gogoa edukiko nuke beste zerbaiten gainean berba egiteko. Momentu honetan gogoa edukiko nuke lehengo egunean «posada de los abrazos» delakoan hil ziren nire hiru auzokideen inguruan zuoi zerbait idazteko, esate baterako. Kontatu, adibidez, zelan ikusi nituen manifestazioan SuperMadrazo ultraheroi gorria eta Jon Aritz Bengoetxea kontzejal lapurra, zirkunstantzia aurpegiaz, heriotza horiekin zerikusirik ez balukete moduan. «Istripu tamalgarri» batengatik manifestatzen ziren, antza, zerbait «ekidinezin» salatzeko, dirudienez. Erantzukizunik ez omen zuen inork eskatzen eta, alta, eurei are gutxiago.

Kontatu nahi nizueke, besteak beste, zelan bizi diren gure herri «maitagarri» honetan lan bila eta mixeriari ihesi datozen lagunak eta zelako lan eskas eta umiliagarriak uzten dizkiegun,euskaldunak jenderik eta abegitsuena, jenderik eta majoena, jenderik eta integratzaileena garela pentsatu bitartean.

Itzel gustatuko litzaidake zutabetxo hau aprobetxatzea zuoi andra-gizonen gatazka esplikatzeko, horretan kontzientzia hartu eragiteko, zapalkuntzaren nondik norakoetan sakontzeko. Edota Euskal Herri hau ezkerretik eraikitzeko klabeetan eta gakoetan hausnarketa egin ahal izateko. Horretarako guztirako gogoa edukiko nuke momentu honetan.

Eta berdin-berdin gertatzen zait beste folio zuriren baten aurrean neure burua kokatzen dudanean. Poesian edo prosan murgiltzeko gogoa eta premia daukadanean, ez dakizue nora arteko gogoak izaten ditudan behar eta merezi ditugun beste gauza guzti horiek azalerazteko, paperera botatzeko, sentiarazi ahal izateko... Errudun sentitu barik, geure mundu txiki honetan gertatzen dabiltzan gauza guztiei muzin eginda, garrantzirik gabeko gauzetan denbora galtzen nabilela sentitu barik. Harremanetaz edo jendarteaz edo eguneroko gatazka txikietaz berba egitea arduragabekeria denik pentsatu barik, burua jan barik. Ez dakizue, benetan, zelako premia daukadan, zelako premia daukagun denok...

Hala ere, badirudi oraindik ez dela literaturarako denbora.

Badirudi, zutabe honetan ere errudun sentituko nintzatekeela azken egunetako ezer aipatu barik, Santutxuko okinaren semea omen den epaile horren gaineko ezer idatzi barik, PSOEren jokoaren inguruan ezer esan barik, geure bidea zein izan beharko litzatekeen ekarri barik, PNVren jarrera maltzurrari buruz deus azaldu barik.

Nahiko esan da eta esan egingo da. Aurrera egingo dugula ezelan ere, apustua horixe ei dela eta tinkoa ei dela.

Ez da kontu makala izango, gero! -