BILBO
Euskal Herriak Bere Eskolak (EHBE) indar berezia eman dio hezkidetzari, eta, hezkidetza sustatzen duen Euskal Curriculum bat lortzeko helburuarekin, lau proposamen «eraikitzaile» aurkeztu zituen atzo Bilbon emandako prentsaurrekoan. Horiek horrela, sortzen ari den Euskal Curriculumak hezkidetzan bete beharreko funtzioa bermatu nahi du.Euskal Herriko ikastetxeetan «Derrigorrezko Eskolaldirako Euskal Curriculuma» proposamenaren gaineko eztabaidetan eragiteko, ekarpen horiek agiri batean jaso eta eta proposatu dituzte. Izan ere, Euskal Curriculuma «ahalik eta curriculum osatuena» izan dadin nahi dutela azaldu zuten talde horretako ordezkariek.
Agiri horretan, Euskal Curriculumaren ezaugarrien artean, hezkidetza sustatu behar duela nabarmentzen da. «Pertsona aske eta integralak hezi eta sexuen arteko parekidetasunaren alde egin behar du: batetik, ezberdintasun sozialak gaindituz;eta bestetik, sexuen arteko eskubide eta aukera berdintasuna bermatuz. Hezkuntza sistemak parekidetasunean oinarritutako Euskal Herria sortzen lagundu behar du», jakinarazi zuten EHBEko kideek.
Baliabide pedagogikoak hautatzeko irizpideak ere agertu zituzten, hainbat alorretan lanean ari diren emakumeekin batera egin zuten agerraldian. Horretaz gain, hezkuntzaren xedea aipatzen denean «aukera berdintasunean oinarrituriko gizarte parekidea lortzea» helburutzat jarri behar dela gaine- ratu zuten.
Hezkuntza sistema propioa
Azkenik, Euskal Curriculumak «hezkidetza politika integral baten aldeko egitasmoa» izan behar duela azaldu zuten EHBEko kideek: «Hezkuntza sistema propio baten bidean, zenbait baliabide eta bitartekorekiko hainbat neurri hartu beharko ditu; besteren artean, hezkidetzaren aldeko egitasmoak gauzatzea, hezitzaileen formazio etengabea bermatzea eta egokiak diren baliabideak erabiltzea bultzatzea».
