BAIONA

Berezkoen Binakako estreinako kanporaketa horrek sekulako ikusmina piztu du, eta seguruenik ere Donapaleuko trinketeko harmailak erabat beteko dira, bertan izango baita Paxkal Ezkurra.

Urruñakoak orain dela bi aste irabazi zuen Bakarkako txapela, eta jendeak hura ikusteko gogo handia du. Panpi Idiart izango du lagun, eta biko oso ona osatzen dute. Idiartek erakutsi zuen Bakarkakoan oso ongi zegoela. Hiru kanporaketa gainditu zituen, eta final-laurdenetan Ozafrainek menderatu zuen, baina Idiartek 38 kintze egin zituen.

Aurrez aurre, ordea, Ibarrola eta Jean Claude Dermit izango dituzte, eta tentuz ibili beharko dute. Ibarrolak bere eguna baldin badu, min handia egin dezake bere sakearekin. Horrekin bakarrik triskantza handia eragin dezake, eta hori ongi zaindu beharko dute Idiartek eta Ezkurrak.

Atzean, gainera,Jean Claude Dermit izango du. Ez da beste inor baino gehiago nabarmentzen, baina eskarmentu handia dauka, eta oso segurua da, pilota oso gutxi galtzen duen horietakoa, eta lasaitasuna ematen du. Dirua Idiart eta Ezkurraren alde aterako da.