- Biarritz
BOk Northampton-eko Noon fitxatu du
BIARRITZ
Northampton (Ingalaterrako Lehen Mailako taldea) taldeko pilierra, Colin Noon, Biarritz Olympique-k fitxatu du joker medical gisa, lesionatutako jokalari bat ordezkatzeko duen aukera aprobetxatuta. Lapurtarrek Kasiano Lealamanu’a samoarra belaunean min hartuta eta denboraldia amaitu arte taldetik at ordezkatzeko fitxatu dute Noon, 30 urtekoa, 1,80 metro eta 114 kilo. Gaur edo bihar iritsiko da Biarritzera Galesen jaio baina 2004an Eskoziarekin jokatu zuen pilierra. Northamptonera denboraldi honetan iritsia, Leicester taldean aritua da, Ingalaterrako Bigarren Mailako Rotherham taldean utzita jokatu aurretik. Sei hilabetez zigortu zuten aurkaria bortizki zapaltzeagatik (stamping) Rotherhamekin jokatzen zuenean, eta Noonek ez du gehiegi jokatu irailean Northamptonera itzuli zenetik, batik bat zangoan izandako lesioagatik. Hasiera batean, BOk Aukuso Faamau samoarra nahi zuen, baina paperekin arazoak zirela-eta bertan behera geratu zen.
|
